ഈട്ടിത്തോപ്പ്: നാല് പതിറ്റാണ്ടിലേറെയായി ഈട്ടിത്തോപ്പിന്റെ ആരോഗ്യപരിരക്ഷയുടെ ഭാഗമായിരുന്ന ഗവൺമെന്റ് ഹോമിയോ ഡിസ്പെൻസറി ഇരട്ടയാറിലേക്ക് മാറ്റിയതിനെതിരെ പ്രദേശത്ത് ജനരോഷം ശക്തമാകുന്നു. സാധാരണക്കാരുടെ പ്രധാന ആശ്രയമായിരുന്ന ചികിത്സാ സ്ഥാപനം ഒരു തരത്തിലുള്ള ജനകീയ കൂടിയാലോചനയും നടത്താതെയാണ് ഈട്ടിത്തോപ്പിൽ നിന്ന് മാറ്റിയതെന്നാണ് സമരസമിതിയുടെ ആരോപണം.

ഡിസ്പെൻസറി മാറ്റിയതിനെതിരെ കഴിഞ്ഞ ദിവസങ്ങളിൽ പ്രതിഷേധ പ്രകടനവും റോഡ് ഉപരോധവും ഉൾപ്പെടെയുള്ള സമരപരിപാടികൾ നടന്നിരുന്നു. ഇതിന്റെ തുടർച്ചയായാണ് ഇന്ന് നൂറുകണക്കിന് ആളുകൾ പങ്കെടുത്ത് ഇരട്ടയാർ ഗ്രാമപഞ്ചായത്ത് ഓഫീസ് ഉപരോധം സംഘടിപ്പിച്ചത്.

ഈട്ടിത്തോപ്പിൽ പ്രവർത്തിച്ചിരുന്ന ഹോമിയോ ഡിസ്പെൻസറി തിരികെ കൊണ്ടുവരണമെന്നതാണ് സമരസമിതിയുടെ പ്രധാന ആവശ്യം. ജനങ്ങളുടെ ആരോഗ്യസേവനവുമായി ബന്ധപ്പെട്ട സ്ഥാപനത്തിന്റെ സ്ഥലംമാറ്റത്തിൽ പ്രദേശവാസികളുടെ അഭിപ്രായം പരിഗണിക്കേണ്ടിയിരുന്നുവെന്നും സമരസമിതി പറയുന്നു.

അതേസമയം, ഡിസ്പെൻസറി ഇരട്ടയാറിലേക്ക് കൊണ്ടുവന്ന പഞ്ചായത്ത് ഭരണസമിതിക്ക് പിന്തുണ പ്രഖ്യാപിച്ച് ഇരട്ടയാർ മർച്ചന്റ്സ് അസോസിയേഷൻ പത്രസമ്മേളനം നടത്തിയതോടെ വിവാദം പുതിയ തലത്തിലേക്ക് കടന്നിരിക്കുകയാണ്.വ്യാപാരി സംഘടനയുടെ നിലപാടിനെതിരെ രൂക്ഷ വിമർശനവുമായി സമരസമിതി രംഗത്തെത്തി. ഒരു നാടിന്റെ ന്യായമായ ആവശ്യത്തിനൊപ്പം നിൽക്കാതെ പഞ്ചായത്ത് ഭരണസമിതിയുടെ തീരുമാനത്തെ പിന്തുണച്ചത് ഈട്ടിത്തോപ്പിലെ ജനങ്ങളോടുള്ള വെല്ലുവിളിയാണെന്നാണ് സമരസമിതിയുടെ ആരോപണം.

ഇതിന്റെ ഭാഗമായി ഇരട്ടയാർ പട്ടണത്തിലെ വ്യാപാര സ്ഥാപനങ്ങൾ ബഹിഷ്‌കരിക്കണമെന്ന ആഹ്വാനവും സമരസമിതി മുന്നോട്ടുവച്ചിട്ടുണ്ട്. സമരസമിതിയുടെ ഈ ആഹ്വാനം ഇരട്ടയാറിലെ വ്യാപാര മേഖലയിലും ആശങ്കയ്ക്ക് ഇടയാക്കിയിട്ടുണ്ട്.

കാർഷിക മേഖലയായ ഈട്ടിത്തോപ്പ്, ബഥേൽ തുടങ്ങിയ പ്രദേശങ്ങളിലെ നിരവധി കുടുംബങ്ങൾ ദൈനംദിന ആവശ്യങ്ങൾക്കായി ആശ്രയിക്കുന്ന പ്രധാന വ്യാപാര കേന്ദ്രമാണ് ഇരട്ടയാർ. ചികിത്സ, വ്യാപാരം, മറ്റ് സേവനങ്ങൾ തുടങ്ങിയ ആവശ്യങ്ങൾക്കായി ഈ പ്രദേശങ്ങളിൽ നിന്നുള്ള വലിയൊരു വിഭാഗം ആളുകൾ ഇരട്ടയാറിലെത്തുന്നുണ്ട്.

അതിനാൽ തന്നെ, ഈട്ടിത്തോപ്പിലെ ജനങ്ങളുടെ ബഹിഷ്‌കരണ ആഹ്വാനം പ്രാവർത്തികമായാൽ അതിന്റെ പ്രതിഫലനം ഇരട്ടയാറിലെ വ്യാപാര മേഖലയിലും ഉണ്ടാകാനുള്ള സാധ്യതയുണ്ടെന്നാണ് വ്യാപാര രംഗത്തുള്ളവരുടെ ആശങ്ക.

അതേസമയം, ഹോമിയോ ഡിസ്പെൻസറി മാറ്റിയതുമായി ബന്ധപ്പെട്ട് പഞ്ചായത്ത് ഭരണസമിതിയുടെ വിശദീകരണവും ആരോഗ്യവകുപ്പിന്റെ ഔദ്യോഗിക നിലപാടും നിർണായകമാണ്. നിലവിൽ പ്രശ്നം ഒരു ആരോഗ്യസ്ഥാപനത്തിന്റെ സ്ഥലമാറ്റം എന്നതിൽ നിന്ന് രണ്ട് പ്രദേശങ്ങൾ തമ്മിലുള്ള ജനകീയ-വ്യാപാര തർക്കത്തിലേക്ക് നീങ്ങുന്ന സാഹചര്യമാണ്. വിഷയം കൂടുതൽ വഷളാകുന്നതിന് മുമ്പ് പഞ്ചായത്ത് ഭരണസമിതിയും ആരോഗ്യവകുപ്പും ജനപ്രതിനിധികളും ബന്ധപ്പെട്ട സംഘടനകളും ഇടപെട്ട് ചർച്ചയിലൂടെ പരിഹാരം കണ്ടെത്തണമെന്ന ആവശ്യവും ശക്തമാകുകയാണ്.

ഹോമിയോ ഡിസ്പെൻസറി ഈട്ടിത്തോപ്പിലേക്ക് തിരികെ കൊണ്ടുവരുന്നതുവരെ സമരം ശക്തമാക്കുമെന്നാണ് സമരസമിതിയുടെ പ്രഖ്യാപനം.