കട്ടപ്പന: പൊതുജനങ്ങൾക്ക് ഗുണമേൻമയുള്ള ഉത്പന്നങ്ങൾ മിതമായ നിരക്കിൽ ലഭ്യമാക്കുന്നതിനായി സപ്ലൈകോ നടത്തുന്ന ഓണം ഫെയറുകൾ ആരംഭിച്ചതായി ജലവിഭവ വകുപ്പ് മന്ത്രി റോഷി അഗസ്റ്റിൻ പറഞ്ഞു. കട്ടപ്പനയിൽ നടന്ന ഇടുക്കി താലൂക്ക് ഓണം ഫെയറിന്റെ ഉദ്ഘാടനം നിർവഹിച്ചു സംസാരിക്കുകയായിരുന്നു മന്ത്രി.

വിപണി വില നിയന്ത്രിക്കാൻ എല്ലാ കേന്ദ്രങ്ങളിലും ആവശ്യ സാധനങ്ങൾ എത്തിച്ചിട്ടുണ്ടെന്നും മന്ത്രി വ്യക്തമാക്കി. ഓണാഘോഷം മതേതര കാഴ്ചപ്പാടുകൾ ഇളം തലമുറയിലേക്ക് പകർന്നു നൽകുന്ന പഴയകാല ഓർമ്മകളുടെ പുതുജീവനാണെന്നും അദ്ദേഹം പറഞ്ഞു.

"ആവലാതികളും പ്രയാസങ്ങളും നിറഞ്ഞ ഘട്ടങ്ങളിലും ഓണത്തെ വരവേൽക്കുന്നവർ മലയാളികളാണ്. 2018-19 ലെ പ്രളയകാലത്തും പരിമിതമായ സൗകര്യങ്ങളിലൂടെയും നമ്മൾ ഓണം ആഘോഷിച്ചിരുന്നു. വിദേശത്തുമുള്ള മലയാളികൾക്കും ഒരേ ആവേശമാണ് ഓണത്തോടുള്ളത്," മന്ത്രി കൂട്ടിച്ചേർത്തു.