തൊടുപുഴ: ന്യൂമാൻ കോളേജ് മലയാളവിഭാഗം മഹാത്മാഗാന്ധി സർവകലാശാലയുടെ സഹകരണത്തോടെ സംഘടിപ്പിക്കുന്ന ദ്വിദിന അന്താരാഷ്ട്ര സെമിനാറിന് തുടക്കമായി. ‘കേരളീയ നവോത്ഥാനത്തിന്റെ ബഹുസ്വരത, തുടർച്ച, പുനർവായന: ഭാഷ, സാഹിത്യം, ചരിത്രം, സംസ്കാരം’ എന്ന വിഷയത്തിലാണ് സെമിനാർ സംഘടിപ്പിക്കുന്നത്.

കാനഡയിലെ കാൽഗറി സർവകലാശാല ഹിസ്റ്ററി വിഭാഗം അസിസ്റ്റന്റ് പ്രൊഫസർ ഡോ. ശരത്ത് കെ. പിള്ള സെമിനാർ ഉദ്ഘാടനം ചെയ്തു.

മാനേജർ മോൺ. ഡോ. പയസ് മലേകണ്ടത്തിൽ അധ്യക്ഷത വഹിച്ചു. ബെംഗളൂരു ധർമാരാം വിദ്യാക്ഷേത്രം പ്രൊഫസർ ഡോ. ഫാ. ജെയിംസ് മാത്യു പാമ്പാറ മുഖ്യപ്രഭാഷണം നടത്തി. കാലടി സംസ്കൃത സർവകലാശാല റിട്ട. പ്രൊഫസർ ഡോ. എൻ. അജയകുമാർ ക്ലാസെടുത്തു.

കോളജ് പ്രിൻസിപ്പൽ പ്രൊഫ. ജെന്നി കെ. അലക്സ്, ഡോ. സിസ്റ്റർ ബിൻസി സി.ജെ, ഡോ. ആനി തോമസ് എന്നിവർ സംസാരിച്ചു. കേരളീയ നവോത്ഥാനത്തിന്റെ വിവിധ തലങ്ങളെ ഭാഷ, സാഹിത്യം, ചരിത്രം, സംസ്കാരം എന്നീ മേഖലകളിലൂടെ വിശകലനം ചെയ്യുന്നതിനും പുനർവായന നടത്തുന്നതിനുമുള്ള വിവിധ സെഷനുകൾ സെമിനാറിന്റെ ഭാഗമായി നടക്കും.