കട്ടപ്പന വൈഎംസിഎയുടെ ഡയാലിസിസ് സഹായതാ പദ്ധതിക്ക് നാഷണൽ കൗൺസിൽ ഓഫ് വൈഎംസിഎ ഓഫ് ഇന്ത്യയുടെ ‘വൈഎംസിഎ ഡയാലിസിസ് സഹായതാ യോജന’ പുരസ്‌കാരം ലഭിച്ചു.

ആലുവയിൽ നടന്ന ദേശീയ പ്രതിനിധി സമ്മേളനത്തിൽ നാഷണൽ കൗൺസിൽ ഓഫ് വൈഎംസിഎ പ്രസിഡന്റ് ജസ്റ്റിസ് കുര്യൻ ജോസഫ് പുരസ്‌കാരം സമ്മാനിച്ചു. കട്ടപ്പന വൈഎംസിഎയ്ക്കുവേണ്ടി സംസ്ഥാന പബ്ലിക് റിലേഷൻസ് ബോർഡ് ചെയർമാൻ ജോർജ് ജേക്കബ്, പദ്ധതി കോർഡിനേറ്റർ കെ. ജെ. ജോസഫ്, നാഷണൽ കമ്മിറ്റി അംഗം യു. സി. തോമസ്, കട്ടപ്പന വൈഎംസിഎ പ്രസിഡന്റ് സൽജു ജോസഫ്, കൺവീനർ രജിറ്റ് ജോർജ് എന്നിവർ പുരസ്‌കാരം ഏറ്റുവാങ്ങി.

കട്ടപ്പന വൈഎംസിഎയുടെയും നാഷണൽ കൗൺസിൽ ഓഫ് വൈഎംസിഎയുടെയും സാമ്പത്തിക സഹായത്തോടെയാണ് ഡയാലിസിസ് സഹായതാ പദ്ധതി നടപ്പാക്കുന്നത്. സെന്റ് ജോൺസ് ആശുപത്രിയുമായി സഹകരിച്ചാണ് പദ്ധതി പ്രവർത്തിക്കുന്നത്. സെന്റ് ജോൺസ് ഡയറക്ടർ ബ്രദർ ബൈജു വാലുപറമ്പിലാണ് പദ്ധതി ഉദ്ഘാടനം ചെയ്തത്.

ഗ്രാമീണ മേഖലയിൽ ഡയാലിസിസ് ചികിത്സ ആവശ്യമായവർക്ക് സാമ്പത്തിക സഹായം ലഭ്യമാക്കുന്നതിലും പദ്ധതി കാര്യക്ഷമമായി നടപ്പാക്കുന്നതിലും കട്ടപ്പന വൈഎംസിഎ നടത്തിയ പ്രവർത്തനങ്ങൾ വിലയിരുത്തിയാണ് ദേശീയ പുരസ്‌കാരത്തിന് അർഹമായത്.