കട്ടപ്പന: ഓണത്തിന്റെ വരവറിയിച്ച് ഫ്രണ്ട്സ് ഓഫ് കട്ടപ്പനയുടെ നേതൃത്വത്തിൽ വിവിധ സംഘടനകളുടെയും സഹകരണത്തോടെ സംഘടിപ്പിക്കുന്ന മാവേലി മഹോത്സവത്തിന്റെ ഭാഗമായി സാംസ്കാരിക ഘോഷയാത്ര ഇന്ന് നടക്കും. വൈകിട്ട് നാലിന് ടൗൺഹാൾ പരിസരത്ത് നിന്ന് ആരംഭിക്കുന്ന ഘോഷയാത്ര കട്ടപ്പന ടൗൺ ചുറ്റി മിനി സ്റ്റേഡിയത്തിൽ സമാപിക്കും.

ചെണ്ടമേളം, നാസിക് ഡോൾ, കഥകളി, തെയ്യം, പുരുഷന്മാരുടെ വിവിധ കലാരൂപങ്ങൾ തുടങ്ങിയവ ഘോഷയാത്രയ്ക്ക് മാറ്റുകൂട്ടും. കുട്ടികളും യുവാക്കളും ഉൾപ്പെടെ വിവിധ വിഭാഗങ്ങളുടെ കലാപരിപാടികളും ഘോഷയാത്രയുടെ ഭാഗമായി അരങ്ങേറും.

തുടർന്ന് സാംസ്കാരിക സമ്മേളനം നടക്കും. വൈകിട്ട് അഞ്ചിന് വിവിധ മത്സരങ്ങളും സംഘടിപ്പിച്ചിട്ടുണ്ട്. പരിപാടിയിൽ സാമൂഹിക, സാംസ്കാരിക, രാഷ്ട്രീയ രംഗങ്ങളിലെ പ്രമുഖർ പങ്കെടുക്കുമെന്ന് സംഘാടകർ അറിയിച്ചു.