പെരിയാർ: ചോറ്റുപാറ കൈത്തോട്ടിലൂടെ രക്തം കലർന്ന മലിനജലവും ഇറച്ചിമാലിന്യങ്ങളും ഒഴുകിയെത്തുന്നതായി നാട്ടുകാരുടെ പരാതി. സമീപത്തെ ഇറച്ചിക്കടയിൽ നിന്നുള്ള മാലിന്യം കലർന്ന വെള്ളമാണ് കൈത്തോട്ടിലേക്ക് ഒഴുക്കിവിടുന്നതെന്നാണ് ആരോപണം.

കൈത്തോട്ടിലൂടെ ഒഴുകിയെത്തുന്ന മലിനജലം പെരിയാർ നദിയിലാണ് പതിക്കുന്നത്. പ്രദേശത്തെ നിരവധി കുടുംബങ്ങളുടെ കുടിവെള്ള സ്രോതസു കൂടിയായ പെരിയാർ നദിയിലേക്ക് മാലിന്യം ഒഴുക്കുന്നത് ഗുരുതരമായ ആരോഗ്യ-പരിസ്ഥിതി പ്രശ്നങ്ങൾക്ക് ഇടയാക്കുമെന്ന ആശങ്കയിലാണ് നാട്ടുകാർ.

രക്തം കലർന്ന വെള്ളവും രൂക്ഷമായ ദുർഗന്ധവും പ്രദേശവാസികൾക്ക് വലിയ ബുദ്ധിമുട്ടാണ് സൃഷ്ടിക്കുന്നത്. ഇറച്ചിമാലിന്യങ്ങൾ യാതൊരു ശാസ്ത്രീയ സംസ്കരണവും കൂടാതെ ജലസ്രോതസിലേക്ക് ഒഴുക്കിവിടുന്നതായും നാട്ടുകാർ ആരോപിച്ചു.

പെരിയാർ നദിയുടെ ജലസ്രോതസ്സ് മലിനമാകുന്നത് തടയുന്നതിനായി ആരോഗ്യവകുപ്പ്, തദ്ദേശ സ്വയംഭരണ സ്ഥാപനങ്ങൾ, മലിനീകരണ നിയന്ത്രണ അധികൃതർ എന്നിവർ അടിയന്തരമായി പരിശോധന നടത്തണമെന്നും മാലിന്യം ഒഴുക്കുന്നവർക്കെതിരെ നിയമനടപടി സ്വീകരിക്കണമെന്നും നാട്ടുകാർ ആവശ്യപ്പെട്ടു.