ചെറുതോണി: പീതപതാകകളുടെയും വാദ്യമേളങ്ങളുടെയും അകമ്പടിയിൽ നടന്ന ചതയദിന ഘോഷയാത്രയോടെ ചെറുതോണി ടൗൺ ഗുരുദേവസ്മരണകളാൽ മുഖരിതമായി. ശ്രീനാരായണ ഗുരുദേവന്റെ 172-ാമത് ജയന്തി ദിനാഘോഷങ്ങളുടെ ഭാഗമായി താന്നിക്കണ്ടം, പൈനാവ് മേഖലകളിൽ നിന്നുള്ള ഘോഷയാത്രകളാണ് വഞ്ചിക്കവലയിൽ സംഗമിച്ച് സംയുക്ത ഘോഷയാത്രയായി ചെറുതോണി ടൗണിലേക്ക് നീങ്ങിയത്.പൈനാവ് ശാഖ 2342-ന്റെ നേതൃത്വത്തിലായിരുന്നു ഘോഷയാത്ര.

രണ്ടു മേഖലകളിൽ നിന്നായി പുറപ്പെട്ട ഘോഷയാത്രകൾ വഞ്ചിക്കവലയിൽ സംഗമിച്ചതിന് ശേഷം പീതപതാകകളും ഗുരുദേവ സന്ദേശങ്ങളും ഉയർത്തിപ്പിടിച്ച് വാദ്യമേളങ്ങളുടെ അകമ്പടിയോടെ ചെറുതോണിയിലേക്ക് നീങ്ങി.

ഗുരുദേവ ജയന്തിയുടെ ആവേശം നിറച്ച ഘോഷയാത്രയിൽ നിരവധി പേർ അണിനിരന്നു. പീതവർണത്തിന്റെ ശോഭയും വാദ്യമേളങ്ങളുടെ താളവും ഗുരുദേവസ്മരണകളും നിറഞ്ഞ ഘോഷയാത്ര ചെറുതോണി ടൗണിൽ ശ്രദ്ധേയമായി.

ഘോഷയാത്രയ്ക്ക് മോഹനൻ ടി.കെ., വിജയൻ പുത്തൻപുരയ്ക്കൽ, ഡോ. ഷീല കമലാദരൻ, എസ്. അജിത് കുമാർ, പി.എൻ. സതീശൻ, അർച്ചന അനി, ശ്രീദേവി ശ്രീനിവാസൻ, ബിന്ദു സരസൻ എന്നിവർ നേതൃത്വം നൽകി.

തൊടുപുഴയിൽ ഗുരുദേവ ജയന്തി ആഘോഷം

തൊടുപുഴ: ശ്രീനാരായണ ഗുരുദേവന്റെ 172-ാമത് ജയന്തി ആഘോഷം 4101 തൊടുപുഴ ടൗൺ ശാഖയുടെ നേതൃത്വത്തിൽ നടന്നു. യൂണിയൻ വൈസ് ചെയർമാൻ എം.എൻ. ബാബു ഉദ്ഘാടനം നിർവഹിച്ചു. ശാഖ പ്രസിഡന്റ് ഡി. മനോഹരൻ അധ്യക്ഷത വഹിച്ചു.

മുൻ യോഗ നേതാക്കളുടെ ഫോട്ടോ അനാച്ഛാദന കർമ്മം ശാഖ യൂണിയൻ കമ്മിറ്റി അംഗം കെ.വി. ഷാജു നിർവഹിച്ചു. യൂണിയൻ വൈസ് ചെയർമാനായി തെരഞ്ഞെടുക്കപ്പെട്ട എം.എൻ. ബാബുവിന് ചടങ്ങിൽ സ്വീകരണവും നൽകി.

പ്രസാദ ഊട്ട്, മംഗല്യ സഹായനിധി, ചികിത്സാ സഹായം, വിദ്യാഭ്യാസ എൻഡോവ്മെന്റ്, ഓണക്കോടി എന്നിവയുടെ വിതരണവും നടന്നു.

വനിതാ സംഘം സംസ്ഥാന സമിതി അംഗം സ്മിത ഉല്ലാസ് ഗുരുദേവ ജയന്തി സന്ദേശം നൽകി. ശാഖ സെക്രട്ടറി എം.വി. വിജയൻ, വനിതാ സംഘം വൈസ് പ്രസിഡന്റ് സരിത രാജേഷ് എന്നിവർ പ്രസംഗിച്ചു.