ഇരട്ടയാർ: ഓണാഘോഷത്തിന്റെ ഭാഗമായി ചക്കക്കാനം ഹിൽടോപ്പ് ആർട്സ് & സ്പോർട്സ് ക്ലബ്ബിന്റെ നേതൃത്വത്തിൽ സംഘടിപ്പിച്ച ‘ഓണപ്പുലരി– 2026’ വിപുലമായ പരിപാടികളോടെ നടന്നു. ചക്കക്കാനം മേച്ചേരിപ്പടി ശശികുമാർ താന്നിക്കുളത്തിന്റെ വീട്ടിൽ വച്ച് തിരുവോണ ദിനത്തിലായിരുന്നു ആഘോഷം.

രാവിലെ ആരംഭിച്ച പരിപാടിയിൽ മിഠായി പെറുക്ക്, കസേരകളി, വാലുപറിയ്ക്കൽ, റൊട്ടികടി, സുന്ദരിക്ക് പൊട്ടുതൊടീൽ, നാരങ്ങാ സ്പൂൺ തുടങ്ങിയ വിവിധ വിനോദ മത്സരങ്ങൾ അരങ്ങേറി. ഉച്ചയ്ക്കുശേഷം നടന്ന മുള കയറ്റം, ചാക്കിലോട്ടം, വടംവലി തുടങ്ങിയ മത്സരങ്ങളിൽ കുട്ടികളും യുവാക്കളും മുതിർന്നവരും ആവേശത്തോടെ പങ്കെടുത്തു.

വൈകിട്ട് ആറിന് നടന്ന സമാപന സമ്മേളനം ഇരട്ടയാർ ഗ്രാമപഞ്ചായത്ത് എട്ടാം വാർഡ് മെമ്പർ കിരൺ ജോർജ്ജ് തോമസ് ഉദ്ഘാടനം ചെയ്തു. ശശികുമാർ താന്നിക്കുളം സ്വാഗതം ആശംസിച്ച ചടങ്ങിൽ പി. എൻ. സുരേന്ദ്രൻ അധ്യക്ഷത വഹിച്ചു.

പാമ്പാടുംപാറ ഗ്രാമപഞ്ചായത്ത് 16-ാം വാർഡ് മെമ്പർ രജനി രഞ്ജിത്ത്, 13-ാം വാർഡ് മെമ്പർ ഷാജി മരുതോലി, ചക്കക്കാനം പൂവേഴ്‌സ് മൗണ്ട് ഗ്രാമവികസന സമിതി സെക്രട്ടറി തങ്കപ്പൻ താന്നിക്കുളം എന്നിവർ ആശംസകൾ നേർന്നു.

തുടർന്ന് വിവിധ മത്സരങ്ങളിൽ വിജയികളായവർക്ക് സമ്മാനങ്ങൾ വിതരണം ചെയ്തു. ഓണത്തിന്റെ സന്തോഷവും കൂട്ടായ്മയും പങ്കുവെച്ച് പ്രദേശവാസികൾ ഒന്നിച്ചുകൂടിയ ആഘോഷം നാടിന്റെ സൗഹൃദത്തിന്റെയും ഒത്തൊരുമയുടെയും വേദിയായി.

ഹിൽടോപ്പ് ആർട്സ് & സ്പോർട്സ് ക്ലബ് പ്രസിഡന്റ് ഷിജോ ശങ്കരൻകുട്ടി, സെക്രട്ടറി പ്രകാശ് ദാസ് താന്നിക്കുളം, ട്രഷറർ പീറ്റർ ടോമി എന്നിവർ പരിപാടികൾക്ക് നേതൃത്വം നൽകി. സമാപനത്തിൽ പ്രകാശ് ദാസ് താന്നിക്കുളം കൃതജ്ഞത രേഖപ്പെടുത്തി.