ഇടുക്കി: സേവനതൽപരരായി വളരുന്ന പുതിയ തലമുറ നാടിന് പുതിയ പ്രതീക്ഷ നൽകുന്നവരാണെന്ന് സഖറിയാ മാർ സേവേറിയോസ് മെത്രാപ്പോലീത്താ. സാമൂഹ്യമാധ്യമങ്ങളുടെ കരവലയത്തിൽ മാത്രം ഒതുങ്ങാതെ, ഡിജിറ്റൽ യുഗത്തിൽ ക്രിയാത്മകമായ ഇടപെടലുകൾ നടത്തുന്ന യുവത സമൂഹത്തിന് അനിവാര്യമാണെന്നും അദ്ദേഹം പറഞ്ഞു.

യുവസമൂഹം സേവനാത്മക പ്രവർത്തനങ്ങൾക്ക് മുൻഗണന നൽകുന്നത് അഭിമാനകരമാണെന്നും മാർ സേവേറിയോസ് അഭിപ്രായപ്പെട്ടു. ഓർത്തഡോക്സ് ക്രൈസ്തവ യുവജനപ്രസ്ഥാനത്തിന്റെ (OCYM) യുവജനവാരാഘോഷത്തിന്റെ കേന്ദ്രതല സമാപന സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

കുങ്കിരിപ്പെട്ടി സെന്റ് തോമസ് ഓർത്തഡോക്സ് കത്തീഡ്രലിൽ നടന്ന ചടങ്ങിൽ ഇടുക്കി ഭദ്രാസന വൈസ് പ്രസിഡന്റ് ഫാ. ജോസ് സാമുവൽ അധ്യക്ഷത വഹിച്ചു. യുവജനപ്രസ്ഥാനം കേന്ദ്ര ട്രഷറർ രെഞ്ചു എം. ജോയ് മുഖ്യസന്ദേശം നൽകി.

എസ്.ഐ. ഡെജി വർഗീസ്, ഫാ. ജെസ്വിൻ ചാക്കോ, ഭദ്രാസന യുവജനപ്രസ്ഥാനം സെക്രട്ടറി അജു ജേക്കബ്, അനീഷ് ജേക്കബ്, നിഖിൽ കെ. യോഹന്നാൻ, തോമസ് ഫിലിപ്പ്, ജെൻസൺ എന്നിവർ സംസാരിച്ചു.

ഒരാഴ്ച നീണ്ടുനിന്ന യുവജനവാരാഘോഷത്തിന്റെ ഭാഗമായി OCYM-ന്റെ നേതൃത്വത്തിൽ വിവിധ ഭദ്രാസനങ്ങളിലും യൂണിറ്റുകളിലും നിരവധി സേവന പ്രവർത്തനങ്ങൾ സംഘടിപ്പിച്ചു. ആതുരാലയങ്ങളിൽ ഭക്ഷണ വിതരണം, രക്തദാന ക്യാമ്പുകൾ, പരിസര ശുചീകരണം, ഓണക്കോടി വിതരണം, ഭക്ഷ്യകിറ്റ് വിതരണം തുടങ്ങിയ പ്രവർത്തനങ്ങൾ ഇതിന്റെ ഭാഗമായി നടന്നു.