പൈനാവ്: ഗവൺമെന്റ് എൻജിനീയറിങ് കോളേജ് ഇടുക്കിയുടെ സിൽവർ ജൂബിലി ആഘോഷങ്ങളുടെ ഭാഗമായി സംഘടിപ്പിച്ച ‘LEGECI 2026’ അലുമിനി സംഗമം പൈനാവിൽ വിപുലമായ പരിപാടികളോടെ നടന്നു. കോളേജിലെ മുൻ വിദ്യാർഥികളും അധ്യാപകരും വിവിധ മേഖലകളിലെ പ്രമുഖരും സംഗമത്തിൽ പങ്കെടുത്തു.

മുൻ പ്രിൻസിപ്പൽ ഡോ. ജലജ എം.ജെ. സംഗമം ഉദ്ഘാടനം ചെയ്ത് ജൂബിലി സന്ദേശം നൽകി. പ്രൊഫ. പ്രിൻസ് വി. ജോസും ബോണിയ അച്ചാമ്മ മാണിയും ചേർന്ന് നടത്തിയ അവതരണത്തോടെയാണ് പരിപാടികൾ ആരംഭിച്ചത്. തുടർന്ന് ദേവപ്രിയ ആർ. പ്രാർഥന അവതരിപ്പിച്ചു.

അലുമ്നി & ഇന്റർനാഷണൽ അഫയേഴ്‌സ് ഡീൻ ഡോ. മഞ്ജു മാനുവൽ സ്വാഗതം പറഞ്ഞു. കോളേജ് പ്രിൻസിപ്പൽ ഡോ. ബൈജു ശശിധരൻ അധ്യക്ഷത വഹിച്ചു.

ആദ്യ അഡ്മിഷൻ ബാച്ചുകളിലെ അധ്യാപകരെയും വിദ്യാർഥികളെയും ആദരിക്കുന്ന ഗുരുവന്ദനം ചടങ്ങും നടന്നു. സിൽവർ ജൂബിലി ഇന്നവേഷൻ അവാർഡുകളും അക്കാദമിക് ടോപ്പേഴ്സ് അവാർഡുകളും വിതരണം ചെയ്തു. അലുമ്നി പ്രതിനിധി വിജീഷ് എൻ.വി., വിവിധ വകുപ്പ് മേധാവികൾ, ഡീനുമാർ എന്നിവർ ആശംസകൾ നേർന്നു.

കാസെറ്റ് ക്ലബ്ബിന്റെ നേതൃത്വത്തിൽ സാംസ്കാരിക പരിപാടികളും സംഗീതാവിഷ്‌കാരവും അരങ്ങേറി. അലുമ്നി സ്പോൺസർ ചെയ്ത ടോപ്പേഴ്സ് അവാർഡുകളും വോളണ്ടിയർ സർട്ടിഫിക്കറ്റുകളും വിതരണം ചെയ്തു.

അലുമ്നി അസോസിയേഷൻ പാനൽ രൂപീകരണവും തിരഞ്ഞെടുപ്പും സംഗമത്തിന്റെ ഭാഗമായി നടന്നു. മുൻ വിദ്യാർഥികൾ തങ്ങളുടെ അനുഭവങ്ങളും കോളേജ് ജീവിതത്തിലെ ഓർമകളും പങ്കുവെച്ച ഓപ്പൺ ഫോറവും ശ്രദ്ധേയമായി.

അലുമ്നി അസോസിയേഷൻ സെക്രട്ടറി പ്രൊഫ. റജിൻ ആർ. നന്ദി രേഖപ്പെടുത്തി. തുടർന്ന് നടന്ന സംഗീത പരിപാടിയോടെ സംഗമം സമാപിച്ചു