ഏലപ്പാറ: മാലിന്യസംസ്‌കരണത്തിൽ വേറിട്ട മാതൃകയുമായി ഏലപ്പാറ ഗ്രാമപഞ്ചായത്ത് ഭരണസമിതി. പഞ്ചായത്തിന്റെ വിവിധ മേഖലകളിൽ നിന്ന് ശേഖരിക്കുന്ന വിവിധതരം മാലിന്യങ്ങൾ ഏലപ്പാറയിലെത്തിച്ച് ഇനംതിരിച്ച് തരംതിരിച്ചശേഷം പുനഃസംസ്‌കരണത്തിനായി കയറ്റി അയക്കുന്ന പദ്ധതിക്കാണ് തുടക്കമായത്.

‘ക്ലീൻ ഏലപ്പാറ’ പദ്ധതിയുടെ ആദ്യഘട്ടം പീരുമേട് എംഎൽഎ സിറിയക് തോമസ് ഉദ്ഘാടനം ചെയ്തു. മാലിന്യങ്ങൾ ശേഖരിച്ച് വിവിധ വിഭാഗങ്ങളായി തരംതിരിക്കുന്ന പ്രവർത്തനങ്ങൾ പഞ്ചായത്തിന്റെ നേതൃത്വത്തിൽ പുരോഗമിക്കുകയാണ്.

തരംതിരിച്ച മാലിന്യങ്ങൾ പഞ്ചായത്തുമായി കരാറിലേർപ്പെട്ട വാസ്‌കോ കമ്പനി കയറ്റിക്കൊണ്ടുപോകും. നിലവിൽ ശേഖരിച്ചിട്ടുള്ള മാലിന്യങ്ങൾ 15 ദിവസത്തിനകം ഇവിടെനിന്ന് പൂർണമായും നീക്കം ചെയ്യാനാണ് തീരുമാനം.

വിനോദസഞ്ചാരികളുടെ പ്രധാന ആകർഷണകേന്ദ്രമായ വാഗമൺ ഉൾപ്പെടുന്ന പഞ്ചായത്താണ് ഏലപ്പാറ. ദിവസേന വലിയ തോതിൽ മാലിന്യം കുമിഞ്ഞുകൂടുന്ന സാഹചര്യത്തിൽ പദ്ധതി പൂർണതോതിൽ നടപ്പാകുന്നതോടെ വാഗമണിന്റെയും ഏലപ്പാറയുടെയും മുഖച്ഛായ മാറുമെന്നാണ് പ്രതീക്ഷ