കട്ടപ്പന: നഗരസഭാ പരിധിയിലെ പൊതു സ്ഥലങ്ങളിൽ മാലിന്യം തള്ളുന്നവർക്കെതിരെ നടപടികൾ കർശനമാക്കി കട്ടപ്പന നഗരസഭ. കഴിഞ്ഞ രണ്ട് ദിവസങ്ങളിലായി പൊതുജനാരോഗ്യ–പരിസ്ഥിതി പരിപാലന വിഭാഗം നടത്തിയ പരിശോധനയിൽ 15ഓളം പേർക്കെതിരെ പിഴ ചുമത്തി.

ഹരിത കർമ്മസേന വീടുകളിൽ നിന്നും വ്യാപാര സ്ഥാപനങ്ങളിൽ നിന്നും ശേഖരിക്കുന്ന അജൈവ മാലിന്യങ്ങൾ താൽക്കാലികമായി സൂക്ഷിക്കുന്ന മിനി എം.സി.എഫുകൾക്ക് സമീപം മാലിന്യം നിക്ഷേപിച്ചവർക്കെതിരെയും നടപടി സ്വീകരിച്ചു. പൊതു ഇടങ്ങളിൽ മാലിന്യം വലിച്ചെറിയുന്നത് കണ്ടെത്തിയവർക്കും പിഴ ചുമത്തിയിട്ടുണ്ട്.

നഗരസഭാ പരിധിയിൽ മാലിന്യം തള്ളുന്നവർക്കെതിരെയുള്ള നിയമനടപടികൾ വരും ദിവസങ്ങളിലും കർശനമായി തുടരുമെന്ന് ക്ലീൻ സിറ്റി മാനേജർ ആറ്റ്ലി പി. ജോൺ അറിയിച്ചു.

എൻഫോഴ്സ്മെന്റ് പ്രവർത്തനങ്ങൾക്ക് സീനിയർ പബ്ലിക് ഹെൽത്ത് ഇൻസ്പെക്ടർ പ്രദീപ് രാജ് ഡി., പബ്ലിക് ഹെൽത്ത് ഇൻസ്പെക്ടർമാരായ അനുപ്രിയ കെ.എസ്., രജിത ഐ., അമ്പിളി ബി.എം., ജീവനക്കാരായ ബിബിൻ തോമസ്, മനു ബാബു, ബിജു മാത്യു എന്നിവർ നേതൃത്വം നൽകി.