ഇടുക്കി: ഓണത്തിന്റെ സ്നേഹവും സന്തോഷവും പങ്കുവെച്ച് ന്യൂമാൻ എൽ.പി. സ്കൂൾ സംഘടിപ്പിച്ച “സ്കൂൾ അമ്മയ്ക്കൊരു ഓണപ്പുടവ” പരിപാടിയുടെ ജില്ലാതല ഉദ്ഘാടനം നടന്നു. കുട്ടികൾക്കായി സ്നേഹത്തോടെ ഭക്ഷണം പാകം ചെയ്ത് നൽകുന്ന സ്കൂളിലെ പാചകത്തൊഴിലാളികളെ ആദരിക്കുന്നതിന്റെ ഭാഗമായാണ് പരിപാടി സംഘടിപ്പിച്ചത്.

ജില്ലാതല ഉദ്ഘാടനം ഇടുക്കി എം.എൽ.എ. റോയി കെ. പൗലോസ് നിർവഹിച്ചു. സിസ്റ്റർ ആനിപ്പോൾ സി.എം.സി. അധ്യക്ഷത വഹിച്ചു. മര്യാപുരം വാർഡ് മെമ്പർ ശ്രീലാൽ എസ്., പി.ടി.എ. പ്രസിഡന്റ് ബിജു വാഴക്കൻ, സ്കൂൾ ഹെഡ്മിസ്ട്രസ് സിസ്റ്റർ ജിജി തോമസ് എന്നിവർ ആശംസകൾ നേർന്നു.

സ്കൂളിലെ കുട്ടികൾക്ക് സ്വന്തം അമ്മയെപ്പോലെ സ്നേഹവും കരുതലും പകർന്നുനൽകുന്ന പാചകത്തൊഴിലാളി സെലിൻ വർഗീസിനെ ചടങ്ങിൽ ഓണപ്പുടവ നൽകി ആദരിച്ചു.

അടുക്കളയിലെ ചൂടിലും തിരക്കിലും കുഞ്ഞുമനസ്സുകൾക്കായി സ്നേഹം പാകം ചെയ്ത് വിളമ്പുന്ന “സ്കൂൾ അമ്മയ്ക്ക്” ഓണക്കോടി സമ്മാനിച്ച ചടങ്ങ് സ്നേഹത്തിന്റെയും നന്ദിയുടെയും മനോഹരമായ സന്ദേശമായി. ആഘോഷങ്ങൾക്കപ്പുറം കരുതലിന്റെയും ആദരവിന്റെയും സന്ദേശം പകർന്ന പരിപാടി കുട്ടികൾക്കും അധ്യാപകർക്കും ഒരുപോലെ ഹൃദ്യമായി.