മുരിക്കാശേരി: ലഹരിക്കെതിരായ പോരാട്ടം പൊലീസിന്റെ മാത്രം ഉത്തരവാദിത്വമല്ലെന്നും ഓരോ വ്യക്തിയും കുടുംബവും ഈ പോരാട്ടത്തിന്റെ ഭാഗമാകണമെന്നും മന്ത്രി രമേശ് ചെന്നിത്തല പറഞ്ഞു. മുരിക്കാശേരി പാവനാത്മാ കോളജിൽ നടന്ന ജില്ലാതല തൂഫാൻ ജാഗരൺ പരിപാടി ഉദ്ഘാടനം ചെയ്യുകയായിരുന്നു മന്ത്രി.

പുതിയ കാലത്ത് നൂതന അന്വേഷണ രീതികളിലൂടെ ലഹരി ശൃംഖലയുടെ വേരറുക്കാനാണ് പൊലീസ് ശ്രമിക്കുന്നതെന്ന് മന്ത്രി പറഞ്ഞു. രാസലഹരിയാണ് ഇന്ന് ലോകം ഭരിക്കുന്നത്. ലഹരി വിതരണക്കാർക്ക് കുട്ടികളുടെ ഭാഷയും സൗഹൃദവലയങ്ങളും താൽപര്യങ്ങളും പുതിയ സാങ്കേതികവിദ്യകളും പരിചിതമാണ്. അതിനാൽ പൊലീസിന്റെ അന്വേഷണ രീതികളും മാറേണ്ടിവരുന്നു.

ലഹരി ശൃംഖലയുടെ ഉറവിടം കണ്ടെത്തുന്നതിനുള്ള സമഗ്രമായ അന്വേഷണമാണ് പൊലീസ് നടത്തുന്നത്. ലഹരിവസ്തുക്കൾ കണ്ടെത്തുന്നതിനായി പൊലീസ് ഡോഗ് സ്ക്വാഡിന് പ്രത്യേക പരിശീലനം നൽകിവരികയാണെന്നും മന്ത്രി പറഞ്ഞു.

662 കേസുകൾ; 717 പേർ പ്രതികൾ

തൂഫാന്റെ മറ്റൊരു മുഖമായ തൂഫാൻ ജാഗരൺ പരിപാടിയാണ് ഇപ്പോൾ നടക്കുന്നത്. ലഹരി സൃഷ്ടിക്കുന്ന ദുസ്സഹമായ സാമൂഹിക പ്രശ്നങ്ങൾ ഓരോ വ്യക്തിയുടെയും മനസിലേക്ക് എത്തിച്ച് അവരെ ലഹരിയിൽനിന്ന് മോചിപ്പിക്കുകയാണ് തൂഫാൻ ജാഗരണിന്റെ ലക്ഷ്യമെന്നും മന്ത്രി പറഞ്ഞു.

ഓപ്പറേഷൻ തൂഫാന്റെ ഭാഗമായി ഇടുക്കി ജില്ലയിൽ 662 കേസുകൾ രജിസ്റ്റർ ചെയ്യുകയും 717 പേരെ പ്രതികളാക്കുകയും ചെയ്തു. 39.28 കിലോഗ്രാം കഞ്ചാവ്, 30.912 ഗ്രാം എംഡിഎംഎ, 113.21 ഗ്രാം ഹാഷിഷ് ഓയിൽ, 135 കഞ്ചാവ് ചെടികൾ എന്നിവ പിടിച്ചെടുത്തു.

സംസ്ഥാനത്താകെ 10,748 പേരെ അറസ്റ്റ് ചെയ്യുകയും 9,000 കേസുകൾ രജിസ്റ്റർ ചെയ്യുകയും ചെയ്തു. ഏകദേശം 170 കോടി രൂപ വിലമതിക്കുന്ന മയക്കുമരുന്നും പിടികൂടിയതായി മന്ത്രി അറിയിച്ചു.

ജില്ലയിലെ ഭൂമി സംബന്ധമായ പ്രശ്നങ്ങൾ പരിഹരിക്കുന്നതിനുള്ള നടപടികൾ സ്വീകരിക്കുമെന്നും മന്ത്രി പറഞ്ഞു.

🤝 ഇടുക്കി രൂപത പൂർണ പിന്തുണ നൽകും

ഓപ്പറേഷൻ തൂഫാനുമായി ഇടുക്കി രൂപത പൂർണമായി സഹകരിക്കുമെന്ന് ബിഷപ് മാർ ജോൺ നെല്ലിക്കുന്നേൽ പറഞ്ഞു. തുടർന്ന് അദ്ദേഹം ലഹരിവിരുദ്ധ പ്രതിജ്ഞ ചൊല്ലിക്കൊടുത്തു.

മാർ ജോൺ നെല്ലിക്കുന്നേൽ, രാമൻ രാജ മന്നാൻ തുടങ്ങി വിവിധ മേഖലകളിൽ പ്രവർത്തിക്കുന്നവർക്ക് മന്ത്രി തൂഫാൻ വാരിയേഴ്സ് ബാഡ്ജ് ധരിപ്പിച്ചു. ആത്മഹത്യയ്ക്ക് ശ്രമിച്ച ഗൃഹനാഥനെ രക്ഷിച്ച എസ്.ഐ ടി.ബി. ബിബിനെയും ചടങ്ങിൽ ആദരിച്ചു.

ചടങ്ങിൽ ചീഫ് വിപ്പ് അഡ്വ. അപു ജോൺ ജോസഫ്, ഡീൻ കുര്യാക്കോസ് എം.പി., എം.എൽ.എമാരായ സിറിയക് തോമസ്, സേനാപതി വേണു, എറണാകുളം റേഞ്ച് ഡി.ഐ.ജി ജി.എച്ച്. യതീഷ് ചന്ദ്ര, ജില്ലാ കളക്ടർ ഡോ. ദിനേശൻ ചെറുവാട്ട്, ജില്ലാ പൊലീസ് മേധാവി ഡോ. എ. നസീം, കട്ടപ്പന നഗരസഭാ ചെയർമാൻ ജോയി വെട്ടിക്കുഴി, ബ്ലോക്ക് പഞ്ചായത്ത് പ്രസിഡന്റ് സാന്ദ്രമോൾ ജിന്നി, പാവനാത്മാ കോളജ് പ്രിൻസിപ്പൽ പ്രഫ. സിജോ പി. ജോർജ്, പഞ്ചായത്ത് പ്രസിഡന്റ് വിനോദ് ജോസഫ്, ഇ.എം. ആഗസ്തി തുടങ്ങിയവർ സംസാരിച്ചു.