മൂന്നാർ: കന്നിമല എസ്റ്റേറ്റിൽ തോട്ടം തൊഴിലാളിക്ക് നേരെ കാട്ടാന പാഞ്ഞടുത്തു. കന്നിമല ലോവർ ഡിവിഷൻ സ്വദേശി പാണ്ടിരാജാണ് കാട്ടാനയുടെ ആക്രമണത്തിൽ നിന്ന് തലനാരിഴയ്ക്ക് രക്ഷപ്പെട്ടത്. ഇന്നലെ രാവിലെയായിരുന്നു സംഭവം.

തേയിലത്തോട്ടത്തിലേക്ക് രണ്ട് കാട്ടാനകൾ ഇറങ്ങിയതോടെയാണ് പ്രദേശത്ത് ഭീതിയുണ്ടായത്. തൊഴിലാളികൾ താമസിക്കുന്ന ലയത്തിന് സമീപം നിൽക്കുകയായിരുന്ന പാണ്ടിരാജിന്റെ നേർക്കാണ് ഒരു കാട്ടാന അപ്രതീക്ഷിതമായി പാഞ്ഞടുത്തത്.

കാട്ടാന അടുത്തെത്തിയതോടെ ജീവൻ രക്ഷിക്കാനായി പാണ്ടിരാജ് ഓടി. പിന്നാലെ കാട്ടാനയും കുറച്ചുദൂരം പിന്തുടർന്നെങ്കിലും സമയോചിതമായി ഓടിമാറിയതോടെ പാണ്ടിരാജ് പരിക്കേൽക്കാതെ രക്ഷപ്പെട്ടു.

കാട്ടാന പാണ്ടിരാജിനെ പിന്തുടരുന്നതിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുന്നുണ്ട്.

ജനവാസമേഖലകളോടും എസ്റ്റേറ്റ് ലയങ്ങളോടും ചേർന്ന് കാട്ടാനകൾ തുടർച്ചയായി എത്തുന്നത് തോട്ടം തൊഴിലാളികൾക്കിടയിൽ ആശങ്ക വർധിപ്പിക്കുകയാണ്. തൊഴിലാളികളുടെ സുരക്ഷ ഉറപ്പാക്കുന്നതിനായി വനംവകുപ്പിന്റെ ആർ.ആർ.ടി. സംഘം പ്രദേശത്ത് നിരീക്ഷണം ശക്തമാക്കണമെന്ന ആവശ്യം ഉയരുന്നുണ്ട്.