തൊടുപുഴ: തൊടുപുഴ ബ്ലോക്ക് പഞ്ചായത്ത് പരിധിയിലെ ആറ് ഗ്രാമപഞ്ചായത്തുകളിലെയും നഗരസഭയിലെയും വിനോദസഞ്ചാര കേന്ദ്രങ്ങളെ കോർത്തിണക്കി സമഗ്ര ടൂറിസം സർക്യൂട്ട് വികസിപ്പിക്കുന്നതിന് മാസ്റ്റർപ്ലാൻ തയ്യാറാക്കുമെന്ന് ബ്ലോക്ക് പഞ്ചായത്ത് പ്രസിഡന്റ് മുഹമ്മദ് അൻഷാദ്.

നെടിയശാല മുണ്ടൻമലയിൽ ബ്ലോക്ക് പഞ്ചായത്ത് ഫണ്ട് ഉപയോഗിച്ച് നിലവിലുള്ള മൂന്നുനില ടൂറിസം പവലിയന് മുകളിൽ നാലാം നില നിർമിച്ച് വിപുലീകരിച്ച വാച്ച് ടവറിന്റെ ഉദ്ഘാടനം നിർവഹിച്ച് സംസാരിക്കുകയായിരുന്നു അദ്ദേഹം.

തൊടുപുഴയിൽ അതിവേഗം വളർന്നുവരുന്ന ഗ്രാമീണ ടൂറിസത്തിന്റെ പ്രധാന കേന്ദ്രമായി മുണ്ടൻമല ടൂറിസം പവലിയനെ മാറ്റുകയാണ് ലക്ഷ്യമെന്ന് അദ്ദേഹം പറഞ്ഞു. പ്രകൃതിരമണീയമായ മുണ്ടൻമലയുടെ മുകളിൽ നാലുനിലകളിലായി ഒരുക്കിയ പവലിയനിൽനിന്ന് വിശാലമായ ദൂരക്കാഴ്ചകൾ ആസ്വദിക്കാനാകും.

തൊടുപുഴ, മൂവാറ്റുപുഴ താലൂക്കുകളിലെ വിശാലമായ താഴ്വാര പ്രദേശങ്ങളുടെ പ്രകൃതിഭംഗിയാണ് മുണ്ടൻമലയിലെത്തുന്ന സഞ്ചാരികളെ പ്രധാനമായും ആകർഷിക്കുന്നത്. രാമക്കൽമേടിനെ അനുസ്മരിപ്പിക്കുന്ന തണുത്ത കാറ്റും കോടമഞ്ഞും ഇവിടത്തെ ടൂറിസം സാധ്യതകൾക്ക് കൂടുതൽ ആകർഷണീയത നൽകുന്നു.

മണക്കാട് പഞ്ചായത്ത് പ്രസിഡന്റ് വത്സ ജോൺ അധ്യക്ഷത വഹിച്ചു. ബ്ലോക്ക് പഞ്ചായത്ത് വൈസ് പ്രസിഡന്റ് ടിസി ജോബ്, സ്ഥിരം സമിതി അധ്യക്ഷ ഷൈനി ഷാജി, പുറപ്പുഴ പഞ്ചായത്ത് പ്രസിഡന്റ് ബബിത അനൂപ്, വൈസ് പ്രസിഡന്റ് മാർട്ടിൻ ജോസഫ്, മണക്കാട് പഞ്ചായത്ത് വൈസ് പ്രസിഡന്റ് റെജി കുന്നംകോട്ട്, ബ്ലോക്ക്-ഗ്രാമപഞ്ചായത്ത് അംഗങ്ങൾ, ബി.ഡി.ഒ സിയാദ് ടി.ഇ., അസിസ്റ്റന്റ് എക്സിക്യൂട്ടീവ് എൻജിനീയർ ദീപ ടി.ആർ. എന്നിവർ സംസാരിച്ചു.