മൂന്നാർ: ലഹരിവിരുദ്ധ പ്രവർത്തനങ്ങൾക്ക് പിന്തുണ പ്രഖ്യാപിച്ച് വൈബ് ആൻഡ് ഫോഗ് മൂന്നാർ റിസോർട്ടുകളുടെ നേതൃത്വത്തിൽ ‘എ ഡ്രഗ് ഫ്രീ ഫ്യൂച്ചർ’ പദ്ധതിക്ക് തുടക്കമായി. വൈബ് റിസോർട്ടിൽ നടന്ന ചടങ്ങിൽ ആഭ്യന്തരമന്ത്രി രമേശ് ചെന്നിത്തല പദ്ധതി ഉദ്ഘാടനം ചെയ്തു.

സഞ്ചാരികളുടെ പ്രധാന കേന്ദ്രമായ മൂന്നാർ മേഖലയിൽ രാസലഹരി ഉൾപ്പെടെയുള്ള മയക്കുമരുന്നുകളുടെ ഉപയോഗം തടയുകയാണ് പദ്ധതിയുടെ പ്രധാന ലക്ഷ്യം. ഇതിന്റെ ഭാഗമായി മൂന്നാർ ഡെസ്റ്റിനേഷൻ മേക്കേഴ്സ് സംഘടനയുടെ നേതൃത്വത്തിൽ ആനച്ചാൽ, മൂന്നാർ മേഖലകളിലെ റിസോർട്ടുകളിൽ ലഹരി ഉപയോഗം ശ്രദ്ധയിൽപ്പെട്ടാൽ ഉടൻ അധികൃതരെ വിവരമറിയിക്കുന്നതിനുള്ള സംവിധാനവും ഒരുക്കും.

സംസ്ഥാനത്തെ മയക്കുമരുന്നിന്റെ പിടിയിൽനിന്ന് മോചിപ്പിക്കുക എന്ന ലക്ഷ്യത്തോടെ ‘ഓപ്പറേഷൻ തൂഫാൻ’ പ്രഖ്യാപിച്ച ആഭ്യന്തരമന്ത്രി രമേശ് ചെന്നിത്തലയെ ചടങ്ങിൽ ബി.എൽ.എം. ഫൗണ്ടർ ആർ. പ്രേംകുമാർ, വൈബ് ആൻഡ് ഫോഗ് ചെയർമാൻ ഡോ. ജോളി ആന്റണി, മാനേജിംഗ് ഡയറക്ടർ ഷോജൻ കൊക്കാടൻ എന്നിവർ ചേർന്ന് പൊന്നാടയണിയിച്ച് ആദരിച്ചു.

റോയ് കെ. പൗലോസ് എം.എൽ.എ. ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. ബി.എൽ.എം. ഫൗണ്ടർ ആർ. പ്രേംകുമാർ, വൈബ് ആൻഡ് ഫോഗ് റിസോർട്ട് ചെയർമാൻ ഡോ. ജോളി ആന്റണി, മാനേജിംഗ് ഡയറക്ടർ ഷോജൻ കൊക്കാടൻ, ചീഫ് ഓപ്പറേറ്റിംഗ് ഓഫീസർ ജെറിൻ ഫിലിപ്പ് എന്നിവർ സംസാരിച്ചു.