കട്ടപ്പന: ശ്രീകൃഷ്ണ ജയന്തി ആഘോഷങ്ങൾക്ക് നിറം പകർന്ന് കട്ടപ്പനയിൽ ബാലഗോകുലത്തിന്റെ നേതൃത്വത്തിൽ മഹാശോഭയാത്ര നടന്നു. ഉണ്ണിക്കണ്ണന്മാരുടെ കൃഷ്ണവേഷങ്ങളും ഗോപികമാരുടെ നൃത്തച്ചുവടുകളും നിശ്ചലദൃശ്യങ്ങളും വാദ്യമേളങ്ങളും നഗരവീഥികളെ ഉത്സവലഹരിയിലാക്കി.

മയിൽപ്പീലി ചൂടിയ കിരീടവും ഓടക്കുഴലുമായി അണിനിരന്ന കുരുന്നുകൾ ശോഭയാത്രയുടെ മുഖ്യ ആകർഷണമായി. താലപ്പൊലിയുമായി അമ്മമാരും വിവിധ കലാരൂപങ്ങളും അകമ്പടിയായി. വഴിനീളെ കൃഷ്ണനാമം മുഴങ്ങിയപ്പോൾ പാതയോരങ്ങളിൽ കാത്തുനിന്ന് നൂറുകണക്കിന് പേർ ശോഭയാത്രയെ വരവേറ്റു.

കൃഷ്ണന്റെ ബാലലീലകൾ പുനരാവിഷ്കരിച്ച നിശ്ചലദൃശ്യങ്ങളും ഉറിയടിയും ആഘോഷത്തിന് മിഴിവേകി. ഭക്തിയും ബാലസൗന്ദര്യവും ഉത്സവത്താളവും ചേർന്ന മഹാശോഭയാത്ര കട്ടപ്പന നഗരത്തിന് വേറിട്ട കാഴ്ചയായി. ഇടുക്കി എംപി ഡീൻ കുര്യാക്കോസും പങ്കാളികളായി.കട്ടപ്പന നഗരത്തിൽ നടന്ന മഹാ ശോഭയാത്രയിൽ നൂറുകണക്കിന് ആളുകളാണ് പങ്കെടുത്തത്.