പെരുവന്താനം: കൂട്ടിക്കൽ ഇളംകാട് പനമൂട്ടിൽ വീട്ടിൽ ബിനു പി.വി. (50) കൊല്ലപ്പെട്ട കേസിൽ പ്രതി അറസ്റ്റിൽ. പെരുവന്താനം പുല്ലുപാറ മുറിഞ്ഞപുഴ തോലമ്മാക്കൽ വീട്ടിൽ തങ്കച്ചൻ ടി.ഡി. (60) ആണ് അറസ്റ്റിലായത്.

സെപ്റ്റംബർ 5ന് വൈകിട്ട് ഇരുവരും തമ്മിലുണ്ടായ വാക്കുതർക്കത്തിനിടെ തങ്കച്ചൻ വീട്ടിനുള്ളിലെ കട്ടിലിനടിയിൽ സൂക്ഷിച്ചിരുന്ന കമ്പിവടി ഉപയോഗിച്ച് ബിനുവിന്റെ തലയ്ക്ക് പിന്നിൽ അടിക്കുകയും കുത്തുകയും ചെയ്തതിനെ തുടർന്ന് ഗുരുതരമായി പരിക്കേറ്റാണ് മരണം സംഭവിച്ചതെന്നാണ് പോലീസ് പറയുന്നത്.

ബിനു മരിച്ചതായി അറിയാതെയാണ് പ്രതി ഫയർഫോഴ്സിനെയും പോലീസിനെയും ആംബുലൻസിനായി ഫോണിൽ ബന്ധപ്പെട്ടത്. സ്ഥലത്തെത്തിയ ഫയർഫോഴ്സ് ഉദ്യോഗസ്ഥരാണ് ബിനു മരിച്ചുകിടക്കുകയാണെന്ന വിവരം പോലീസിനെ അറിയിച്ചത്. തുടർന്ന് നടത്തിയ അന്വേഷണത്തിലാണ് പ്രതിയെ അറസ്റ്റ് ചെയ്തത്.