പുറ്റടി: ലഹരിക്കെതിരായ ബോധവത്കരണ പ്രവർത്തനങ്ങളുടെ ഭാഗമായി വണ്ടൻമേട് പോലീസിന്റെ നേതൃത്വത്തിൽ ഹോളി ക്രോസ് കോളേജ് വിദ്യാർത്ഥികൾക്കായി ‘ഓപ്പറേഷൻ തൂഫാൻ’ ബോധവത്കരണ ക്ലാസ് സംഘടിപ്പിച്ചു.

വണ്ടൻമേട് പോലീസ് സ്റ്റേഷൻ എസ്.എച്ച്.ഒ ബെർട്ടിൻ ജോസ്, അസിസ്റ്റന്റ് പി.ആർ.ഒ അരുൺ പ്രസാദ് എന്നിവർ ക്ലാസുകൾക്ക് നേതൃത്വം നൽകി.

ലഹരി ഉപയോഗത്തിന്റെ സാമൂഹികവും ആരോഗ്യപരവുമായ പ്രത്യാഘാതങ്ങൾ, യുവാക്കൾ ലഹരിയിലേക്ക് ആകർഷിക്കപ്പെടുന്ന സാഹചര്യങ്ങൾ, ലഹരിക്കെതിരായ നിയമനടപടികൾ എന്നിവ സംബന്ധിച്ച് ക്ലാസിൽ വിശദീകരിച്ചു. വിദ്യാർത്ഥികളിൽ ലഹരിവിരുദ്ധ മനോഭാവവും സാമൂഹിക ഉത്തരവാദിത്വവും വളർത്തേണ്ടതിന്റെ പ്രാധാന്യവും ചർച്ച ചെയ്തു.

കോളേജ് പ്രിൻസിപ്പൽ പ്രൊഫ. ഷാജി ആർ. കെ. സ്വാഗതം ആശംസിച്ചു.കോളേജ് വിമുക്തി  കോർഡിനേറ്റർ അസി. പ്രൊഫ. ബിബിൻ കെ. രാജു കൃതജ്ഞത രേഖപ്പെടുത്തി.