ഇടുക്കി: കഞ്ഞിക്കുഴിയിൽ വയോധികനെ കമ്പിവടി കൊണ്ട് തലയ്ക്കടിച്ച് ഗുരുതരമായി പരിക്കേൽപ്പിച്ച കേസിൽ പ്രതി അറസ്റ്റിൽ. തൃശൂർ പറപ്പുക്കര പുളിക്കൻ വീട്ടിൽ യദുകൃഷ്ണൻ (30) ആണ് കഞ്ഞിക്കുഴി പൊലീസിന്റെ പിടിയിലായത്.

ഓഗസ്റ്റ് 30നാണ് കേസിനാസ്പദമായ സംഭവം. കഞ്ഞിക്കുഴി പഴയ ബസ് സ്റ്റാൻഡിലെ വെയ്റ്റിംഗ് ഏരിയയിൽ കിടന്നുറങ്ങുകയായിരുന്ന വയോധികനെ, അദ്ദേഹം നടക്കാൻ ഉപയോഗിക്കുന്ന വടി ഉപയോഗിച്ച് പ്രതി ക്രൂരമായി തലയ്ക്കടിച്ച് പരിക്കേൽപ്പിക്കുകയായിരുന്നു.

അക്രമത്തിന് ശേഷം ഒളിവിൽ പോയ പ്രതിയെ കട്ടപ്പന കോഴിമലയിലുള്ള ഭാര്യവീട്ടിൽനിന്നാണ് പൊലീസ് പിടികൂടിയത്. പ്രദേശത്തെ നിരവധി സി.സി.ടി.വി. ദൃശ്യങ്ങളും മൊബൈൽ ടവർ ലൊക്കേഷനുകളും കേന്ദ്രീകരിച്ച് നടത്തിയ അന്വേഷണത്തിനൊടുവിലാണ് പ്രതിയെ കണ്ടെത്തിയത്.

കഞ്ഞിക്കുഴി പൊലീസ് സബ് ഇൻസ്പെക്ടർമാരായ ശ്യാം എം.കെ., സജീവ് മാത്യു, സിവിൽ പൊലീസ് ഓഫീസർമാരായ മാത്യു സ്റ്റീഫൻ, താജുദ്ദീൻ എന്നിവരടങ്ങിയ സംഘമാണ് പ്രതിയെ പിടികൂടിയത്.

പ്രതിക്കെതിരെ നേരത്തെ മൂന്ന് അബ്കാരി കേസുകൾ നിലവിലുണ്ടെന്ന് പൊലീസ് അറിയിച്ചു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.