കട്ടപ്പന: ഇടുക്കിയുടെ നാടകവേദിയിലെ ശ്രദ്ധേയ പ്രതിഭ കെ.സി. ജോർജിന്റെ രണ്ടാമത് ചരമവാർഷിക ദിനാചരണവും കെ.സി. നാടക പ്രതിഭ പുരസ്കാര സമർപ്പണവും സെപ്റ്റംബർ 23ന് കട്ടപ്പന സി.എസ്.ഐ ഗാർഡനിൽ നടക്കും. കെ.സി. സൗഹൃദ കൂട്ടായ്മയുടെ നേതൃത്വത്തിലാണ് പരിപാടികൾ സംഘടിപ്പിക്കുന്നത്.

രണ്ടുതവണ സംസ്ഥാന സർക്കാരിന്റെ മികച്ച നാടക രചനയ്ക്കുള്ള പുരസ്കാരം നേടിയ കെ.സി. ജോർജ് 2024 സെപ്റ്റംബർ 23നാണ് അന്തരിച്ചത്. നാടക-സീരിയൽ രംഗത്ത് സജീവമായി പ്രവർത്തിച്ചുവരുന്നതിനിടെയായിരുന്നു ആകസ്മിക വേർപാട്.

ഇത്തവണ ഇടുക്കിയിലെ മുതിർന്ന നാടക-സിനിമ നടൻ ജോസഫ് ചിലമ്പനാണ് കെ.സി. പുരസ്കാരത്തിന് അർഹനായത്. 10,001 രൂപയും ഉപഹാരവും അടങ്ങുന്നതാണ് പുരസ്കാരം. പ്രഥമ കെ.സി. പുരസ്കാരം മുതിർന്ന നാടകകൃത്ത് എം.ജെ. ആന്റണിക്കായിരുന്നു.

സെപ്റ്റംബർ 23ന് സി.എസ്.ഐ ഗാർഡനിൽ നടക്കുന്ന ചടങ്ങിൽ പ്രശസ്ത നാടക-സിനിമ നടൻ രാജേഷ് ശർമ പുരസ്കാരം സമർപ്പിക്കും. മികച്ച നാടകകൃത്തിനുള്ള സംസ്ഥാന സർക്കാർ പുരസ്കാരം നേടിയ ഹേമന്തകുമാർ കെ.സി. അനുസ്മരണ പ്രഭാഷണം നടത്തും.

കേന്ദ്ര സാഹിത്യ അക്കാദമി യുവപുരസ്കാര ജേതാവ് മോബിൻ മോഹന്റെ പുതിയ കഥാസമാഹാരം ‘അമർഷ നഗരം’ ചടങ്ങിൽ പ്രകാശനം ചെയ്യും.

തുടർന്ന് സംസ്ഥാന സർക്കാരിന്റെ ആറ് പുരസ്കാരങ്ങൾ നേടിയ വള്ളുവനാട് ബ്രഹ്മയുടെ ‘പകലിൽ മറഞ്ഞിരുന്നൊരാൾ’ എന്ന നാടകം അരങ്ങിലെത്തും.

വാർത്താസമ്മേളനത്തിൽ സംഘാടക സമിതി ചെയർമാൻ ഇ.ജെ. ജോസഫ്, ജനറൽ കൺവീനർ എം.സി. ബോബൻ, ഭാരവാഹികളായ മോബിൻ മോഹൻ, സിജു ചക്കുംമൂട്ടിൽ, റോയി വർഗീസ്, നന്ദൻ മേനോൻ, ജയ്ബി ജോസഫ്, പി.ബി. സുരേഷ് എന്നിവർ പങ്കെടുത്തു.