ഇടുക്കി: ശബരിമല മണ്ഡല-മകരവിളക്ക് മഹോത്സവത്തോടനുബന്ധിച്ച് ചരിത്രപ്രാധാന്യമുള്ള മുക്കുഴി കാനനപാതയും മുക്കുഴി ക്ഷേത്രവും പീരുമേട് എംഎൽഎ സിറിയക് തോമസ് സന്ദർശിച്ചു. നിരവധി അയ്യപ്പഭക്തർ ശബരിമലയിലേക്ക് പോകുന്നതിനായി ആശ്രയിക്കുന്ന മുക്കുഴി കാനനപാതയിലെ അടിസ്ഥാന സൗകര്യങ്ങളുടെ അപര്യാപ്തത ഉൾപ്പെടെയുള്ള പ്രശ്നങ്ങൾ പരിഹരിക്കാൻ നടപടി സ്വീകരിക്കുമെന്ന് അദ്ദേഹം പറഞ്ഞു.

കാനനപാതയിലെ റോഡ് നിർമാണം പൂർത്തിയാക്കാൻ ആവശ്യമായ ഫണ്ട് അനുവദിച്ച് ശേഷിക്കുന്ന പ്രവൃത്തികൾ എത്രയും വേഗം പൂർത്തീകരിക്കാൻ ശ്രമിക്കും. ഭക്തർക്ക് ആവശ്യമായ ശുചിമുറി സൗകര്യങ്ങളുടെ കുറവും വിരിവെക്കുന്നതിനുള്ള സ്ഥലപരിമിതിയും പ്രധാന പ്രശ്നങ്ങളാണ്. ഇവയുൾപ്പെടെയുള്ള ബുദ്ധിമുട്ടുകൾ സർക്കാരിന്റെ ശ്രദ്ധയിൽപ്പെടുത്തി പരിഹാരം കാണാൻ ശ്രമിക്കുമെന്നും എംഎൽഎ വ്യക്തമാക്കി.

സന്ദർശനത്തിൽ ബ്ലോക്ക് പഞ്ചായത്ത് വൈസ് പ്രസിഡന്റ് ജോൺ പി. തോമസ്, പഞ്ചായത്ത് അംഗം രെഞ്ചു സജിമോൻ എന്നിവരും എംഎൽഎയോടൊപ്പമുണ്ടായിരുന്നു.