കട്ടപ്പന: സാംസ്കാരിക സംഘടനകളുടെ ഐക്യദാർഢ്യ സദസ് അലങ്കോലപ്പെടുത്താൻ ശ്രമിച്ച സംഘപരിവാർ നടപടിയിൽ പ്രതിഷേധിച്ച് ഡിവൈഎഫ്ഐയുടെ നേതൃത്വത്തിൽ ജനകീയ പ്രതിരോധ സംഗമം നടത്തി.

കഴിഞ്ഞ ശനിയാഴ്ച ജന്തർമന്തർ സമരത്തിന് പിന്തുണ പ്രഖ്യാപിച്ച് സാംസ്കാരിക പ്രവർത്തകർ കട്ടപ്പന ഗാന്ധി സ്ക്വയറിൽ ഐക്യദാർഢ്യ സദസ് സംഘടിപ്പിച്ചിരുന്നു. സാംസ്കാരിക പ്രവർത്തകർ സംസാരിക്കുന്നതിനിടെ ആർഎസ്എസ്–ബിജെപി പ്രവർത്തകർ പ്രതിഷേധവുമായി എത്തിയെന്നാണ് സംഘാടകർ പറയുന്നത്. ഇതിൽ പ്രതിഷേധിച്ചാണ് ഡിവൈഎഫ്ഐ ജനകീയ പ്രതിരോധ സംഗമം സംഘടിപ്പിച്ചത്.

ഡിവൈഎഫ്ഐ ജില്ലാ സെക്രട്ടറി എസ്. സുധീഷ് സംഗമം ഉദ്ഘാടനം ചെയ്തു. ബ്ലോക്ക് പ്രസിഡന്റ് എം. ശിവകുമാർ അധ്യക്ഷത വഹിച്ചു. സെക്രട്ടറി നിയാസ് അബു, ജില്ലാ കമ്മിറ്റിയംഗം ആതിര ശ്രീകുമാർ, പുരോഗമന കലാസാഹിത്യ സംഘം ജില്ലാ പ്രസിഡന്റ് സുഗതൻ കരുവാറ്റ, ജില്ലാ കമ്മിറ്റിയംഗങ്ങളായ അഡ്വ. വി.എസ്. ദിപു, കെ.ആർ. രാമചന്ദ്രൻ, ആർ. മുരളീധരൻ, ടി.കെ. വാസു, കെ.വി. രവീന്ദ്രനാഥ് എന്നിവർ സംസാരിച്ചു.

വിവിധ സാംസ്കാരിക സംഘടനാ നേതാക്കളും പൊതുജനങ്ങളും സംഗമത്തിൽ പങ്കെടുത്തു.