തന്റെ ഭരണകാലത്തെ കുറിച്ച് ഏകപക്ഷീയമായ ആക്രമണങ്ങൾ നടക്കുന്നുണ്ടെന്നും മറുപടി പറയാൻ സമയമായെന്ന് തോന്നിയതുകൊണ്ടാണ് ഇപ്പോൾ പ്രതികരിക്കുന്നതെന്നും എ.കെ ആന്റണി പറഞ്ഞു.

ഇന്നലെ നടന്ന മുഖ്യമന്ത്രിയുടെ നിയമസഭ പ്രസംഗത്തിന് മറുപടി നൽകി മാധ്യമങ്ങളോട് സംസാരിക്കുകയായിരുന്നു ഇദ്ദേഹം.

മുത്തങ്ങ സമരത്തിൽ തന്റെ പൊലീസ് മണ്ണെണ്ണയും പഞ്ചസാരയും ചേര്‍ത്തു പത്തിലേറെ ആദിവാസികളെ ചുട്ടുകരിച്ചെന്ന് അന്നത്തെ പ്രതിപക്ഷ നേതാവ് പച്ചക്കള്ളം പറഞ്ഞെന്നും എ.കെ ആന്റണി പറഞ്ഞു.

കേരളത്തിലെ ആദിവാസികള്‍ക്ക് ഏറ്റവും കൂടുതല്‍ ഭൂമി കൊടുത്തത് താനാണെന്ന് എ.കെ. ആന്റണി പറഞ്ഞു. ആദിവാസികൾക്ക് വേണ്ടി ഒരുപാട് കാര്യങ്ങൾ ചെയ്ത ആളാണ് താനെന്നും ഒടുവിൽ ആദിവാസികളെ ചുട്ടുകരിച്ചെന്ന പഴി തനിക്ക് കേള്‍ക്കേണ്ടി വന്നെന്നും അദ്ദേഹം കൂട്ടിച്ചേർത്തു.