വാഗമൺ: പശ്ചിമഘട്ട പരിസ്ഥിതിലോല മേഖലകളുടെ കരട് വിജ്ഞാപനത്തിൽനിന്ന് ജനവാസ മേഖലകളെയും കൃഷിയിടങ്ങളെയും ഒഴിവാക്കുക, മലയോര മേഖലയിലെ ഭൗമദുരന്ത സാധ്യതകൾ പഠിച്ച് പ്രതിരോധ സംവിധാനങ്ങൾ ശക്തിപ്പെടുത്തുക, ലഹരിവിരുദ്ധ പ്രവർത്തനങ്ങൾ ഊർജിതമാക്കുക എന്നീ ആവശ്യങ്ങളുന്നയിച്ച് പാലാ രൂപതാ കൗൺസിലുകളുടെ മൂന്ന് പ്രമേയങ്ങൾ ഐകകണ്ഠ്യേന പാസാക്കി.

പാലാ രൂപതയുടെ പാസ്റ്ററൽ കൗൺസിലിന്റെയും പ്രെസ്ബിറ്ററൽ കൗൺസിലിന്റെയും സംയുക്ത സമ്മേളനം ബിഷപ്പ് മാർ ജോസഫ് കല്ലറങ്ങാട്ടിന്റെ അധ്യക്ഷതയിൽ വാഗമൺ മൗണ്ട് നെബോ റിട്രീറ്റ് സെന്ററിൽ ചേർന്നു. പാസ്റ്ററൽ കൗൺസിൽ സെക്രട്ടറി അഡ്വ. സിജി ആന്റണി അവതരിപ്പിച്ച പ്രമേയങ്ങളാണ് സമ്മേളനം അംഗീകരിച്ചത്.

2026 ജൂലൈ 27-ലെ പശ്ചിമഘട്ട പരിസ്ഥിതിലോല പ്രദേശങ്ങളുടെ കരട് വിജ്ഞാപനത്തിൽ ഉൾപ്പെട്ട കൂട്ടിക്കൽ, മേലുകാവ്, തീക്കോയി, പൂഞ്ഞാർ തെക്കേക്കര വില്ലേജുകളിലെ ജനവാസ മേഖലകൾ, കൃഷിയിടങ്ങൾ, തോട്ടങ്ങൾ, വാണിജ്യ കേന്ദ്രങ്ങൾ എന്നിവ അന്തിമ വിജ്ഞാപനത്തിൽനിന്ന് ഒഴിവാക്കണമെന്ന് ആദ്യ പ്രമേയം ആവശ്യപ്പെട്ടു.

ഒക്ടോബർ 15-ന് കേരള നിയമസഭ ഏകകണ്ഠമായി പാസാക്കിയ പ്രമേയത്തിന് പിന്തുണ പ്രഖ്യാപിച്ച രൂപതാ കൗൺസിലുകൾ, ജനവാസ മേഖലകളും കൃഷിയിടങ്ങളും ഒഴിവാക്കി 98 റവന്യൂ വില്ലേജുകളിലായി 8,590.69 ചതുരശ്ര കിലോമീറ്റർ മാത്രം ഉൾപ്പെടുത്തണമെന്ന സംസ്ഥാന സർക്കാരിന്റെ നിർദേശം അംഗീകരിക്കണമെന്നും ആവശ്യപ്പെട്ടു. ഉപഗ്രഹചിത്രങ്ങളെ മാത്രം ആശ്രയിക്കാതെ ശാസ്ത്രീയമായ സ്ഥലപരിശോധനയും യഥാർഥ ഭൂവിനിയോഗവും അടിസ്ഥാനമാക്കി അതിർത്തികൾ പുനർനിർണയിക്കണമെന്നും കേന്ദ്ര സർക്കാരിനോട് അഭ്യർഥിച്ചു.

ഭൗമദുരന്ത സാധ്യതകൾ പഠിക്കണം

വാഗമൺ ഉൾപ്പെടെയുള്ള പാലാ രൂപതയുടെ കിഴക്കൻ മലയോര മേഖലയിൽ 40-ലധികം ഭൂചലന പ്രകമ്പനങ്ങൾ റിപ്പോർട്ട് ചെയ്ത സാഹചര്യത്തിൽ സമ്മേളനം ആശങ്ക രേഖപ്പെടുത്തി. വാഗമൺ–തീക്കോയി മേഖലയുടെ ഭൗമശാസ്ത്രപരമായ അപകടസാധ്യതകൾ സമഗ്രമായി പഠിക്കാൻ പ്രത്യേക പഠനകേന്ദ്രം സ്ഥാപിക്കുക, ഉപഗ്രഹാധിഷ്ഠിത നിരീക്ഷണവും മുൻകൂർ മുന്നറിയിപ്പ് സംവിധാനവും ഏർപ്പെടുത്തുക എന്നിവയാണ് രണ്ടാമത്തെ പ്രമേയത്തിലെ പ്രധാന ആവശ്യങ്ങൾ.

മണ്ണും മണലും അടിഞ്ഞുകൂടി പ്രവർത്തനക്ഷമത നഷ്ടപ്പെട്ട ചെക്ക് ഡാമുകൾ ശുചീകരിച്ച് പുനഃപ്രവർത്തനക്ഷമമാക്കാനും ദുരന്തസാധ്യതകൾ കുറയ്ക്കാനും കേന്ദ്ര–സംസ്ഥാന ദുരന്തനിവാരണ ഫണ്ടുകൾ വിനിയോഗിക്കണമെന്നും പ്രമേയം നിർദേശിച്ചു. ദുരന്തബാധിതർക്ക് അർഹമായ നഷ്ടപരിഹാരവും പുനരധിവാസവും ഉറപ്പാക്കണമെന്നും ആവശ്യപ്പെട്ടു.

ലഹരിവിരുദ്ധ പ്രവർത്തനങ്ങൾക്ക് കുടുംബങ്ങൾ നേതൃത്വം നൽകണം

കുടുംബങ്ങളെ ലഹരിവിരുദ്ധ പ്രവർത്തനങ്ങളുടെ പ്രഥമ കേന്ദ്രങ്ങളാക്കി മാറ്റണമെന്നും ഇടവകകൾ, വിദ്യാഭ്യാസ സ്ഥാപനങ്ങൾ, സാമൂഹിക കൂട്ടായ്മകൾ എന്നിവയുടെ നേതൃത്വത്തിൽ ബോധവത്കരണം ശക്തിപ്പെടുത്തണമെന്നും മൂന്നാമത്തെ പ്രമേയം ആഹ്വാനം ചെയ്തു. ലിയോ പതിനാലാമൻ മാർപാപ്പയുടെ 2026 ഓഗസ്റ്റ് 27-ലെ ആഹ്വാനത്തിന്റെ പശ്ചാത്തലത്തിലാണ് നിർദേശം.

കേരള സർക്കാരിന്റെ ഓപ്പറേഷൻ തൂഫാനുമായി സഹകരിച്ച് ലഹരിമരുന്ന് നിർമാണ–വിതരണ ശൃംഖലകൾക്കെതിരെ ശക്തമായ നടപടി സ്വീകരിക്കണമെന്നും സർക്കാർ വകുപ്പുകൾ തമ്മിലുള്ള ഏകോപനം ഉറപ്പാക്കണമെന്നും പ്രമേയം ആവശ്യപ്പെട്ടു. മദ്യലഭ്യത സുഗമമാക്കുന്ന നയങ്ങൾ പുനഃപരിശോധിക്കുക, ലഹരിക്ക് അടിമപ്പെട്ടവർക്കും അവരുടെ കുടുംബങ്ങൾക്കും ചികിത്സ, കൗൺസലിങ്, പുനരധിവാസം എന്നിവ ലഭ്യമാക്കുക എന്നീ ആവശ്യങ്ങളും മുന്നോട്ടുവച്ചു.

യുവജനങ്ങളുടെ വിശ്വാസരൂപീകരണം, കുടുംബസംരക്ഷണം, കാർഷിക വികസനം, തൊഴിൽസാധ്യതകൾ, വയോജന സംരക്ഷണം, ദളിത് ക്രൈസ്തവരുടെ വിദ്യാഭ്യാസ പ്രശ്നങ്ങൾ, രൂപതാ സ്ഥാപനങ്ങളുടെ പ്രവർത്തനം, സാങ്കേതികവിദ്യയുടെ ഉത്തരവാദിത്തപൂർണമായ ഉപയോഗം തുടങ്ങിയ വിഷയങ്ങളും സമ്മേളനം ചർച്ച ചെയ്തു.

പ്രോട്ടോസിഞ്ചെല്ലൂസ് മോൺ. ജോസഫ് തടത്തിൽ, വികാരി ജനറൽമാർ, പ്രെസ്ബിറ്ററൽ കൗൺസിൽ സെക്രട്ടറി ഫാ. മാത്യു ആലപ്പാട്ടുമേടയിൽ, പാസ്റ്ററൽ കൗൺസിൽ ചെയർമാൻ ഡോ. വി. പി. ദേവസ്യ തുടങ്ങിയവരടക്കം 300-ലധികം പേർ പങ്കെടുത്തു. ഇരുകൗൺസിലുകളുടെയും സെക്രട്ടറിമാർ റിപ്പോർട്ടുകൾ അവതരിപ്പിച്ചു.

മൗണ്ട് നെബോ റിട്രീറ്റ് സെന്റർ ഡയറക്ടർ ഫാ. തോമസ് വാഴഹാറിക്കലും സംഘവും സമ്മേളനത്തിന്റെ ക്രമീകരണങ്ങൾക്ക് നേതൃത്വം നൽകി. രൂപതാ പ്രൊക്യുറേറ്റർ ഫാ. ജോസഫ് മുത്തനാട്ടിന്റെയും ചാൻസലർ ഫാ. ജോസ് കൂറ്റിയാങ്കലിന്റെയും സഹകരണത്തോടെ നടന്ന സമ്മേളനം പ്രാർഥനാശുശ്രൂഷയോടും ആരാധനയോടും കൂടി സമാപിച്ചു.