കോതമംഗലം ∙ പുതുപ്പാടിക്ക് സമീപം നാല് വാഹനങ്ങൾ തമ്മിൽ ഉണ്ടായ കൂട്ടിയിടിയിൽ ഒരാൾ മരിച്ചു, നാലുപേർ ഗുരുതരാവസ്ഥയിൽ ചികിത്സയിൽ.

മൂവാറ്റുപുഴയിൽ നിന്ന് കോതമംഗലം ഭാഗത്തേക്ക് പോവുകയായിരുന്ന നാഷണൽ പെർമിറ്റ് ലോറിയും, പൂപ്പാറയിൽ നിന്നെത്തിയ മാരുതി ആൾട്ടോ കാറും, പിക്കപ്പും തമ്മിലായിരുന്നു അപകടം. ഇടിയുടെ ആഘാതത്തിൽ നിയന്ത്രണം വിട്ട ലോറി കോതമംഗലം സ്വദേശിയുടെ സ്കൂട്ടറിലേക്കും ഇടിച്ചു കയറി.

പൂപ്പാറ സ്വദേശികൾ സഞ്ചരിച്ച മാരുതി ആൾട്ടോ കാർ ലോറിയെ മറികടക്കാൻ ശ്രമിക്കുന്നതിനിടയിലാണ് അപകടം ഉണ്ടായതെന്നാണ് പ്രാഥമിക വിവരം. അപകടത്തിൽ കാറിൽ സഞ്ചരിച്ച ഒരാൾ സംഭവസ്ഥലത്തുവച്ച് തന്നെ മരിച്ചു. മറ്റൊരാളുടെ മരണവിവരവും സ്ഥിരീകരിക്കാത്ത രീതിയിൽ ലഭിച്ചിട്ടുണ്ട്.

നിയന്ത്രണം വിട്ട ലോറി വട്ടം തിരിഞ്ഞ് സമീപത്തെ ഇറച്ചിക്കടയിലിടിച്ച് നിന്നു.സ്കൂട്ടർ യാത്രക്കാരനായ കോതമംഗലം സ്വദേശിയും, കാറിലുണ്ടായിരുന്ന മറ്റു യാത്രക്കാരും ഗുരുതരാവസ്ഥയിൽ ചികിത്സയിലാണ്. അപകടത്തിൽ മാരുതി ആൾട്ടോ കാർ പൂർണമായും തകർന്നു.