വോട്ടർപട്ടികയിൽ അർഹരായ എല്ലാവരെയും ഉൾപ്പെടുത്തുന്നതിനായി സംസ്ഥാനവ്യാപകമായി പ്രത്യേക എൻറോൾമെന്റ് ഡ്രൈവ് നടത്തും. ഒക്ടോബർ 15 മുതൽ 31 വരെ വില്ലേജ് ഓഫീസുകൾ കേന്ദ്രീകരിച്ച് ഡിജിറ്റൽ ഹെൽപ് ഡെസ്‌കുകൾ പ്രവർത്തിപ്പിക്കുമെന്ന് മുഖ്യ തിരഞ്ഞെടുപ്പ് ഓഫീസർ ഡോ. ഡി. സജിത്ത് ബാബു അറിയിച്ചു. ജില്ലാ കളക്ടർമാരുമായി നടത്തിയ ഓൺലൈൻ യോഗത്തിലാണ് ഇതുസംബന്ധിച്ച നിർദേശം നൽകിയത്.

വോട്ടർപട്ടികയിൽ പേര് ചേർക്കാൻ നിയമപ്രകാരമുള്ള ഫോം 6 മാത്രം സമർപ്പിച്ചാൽ മതിയാകും. സിറ്റിസൺ സർവീസ് പോർട്ടൽ, വോട്ടർ ഹെൽപ്‌ലൈൻ ആപ്പ് എന്നിവയിലൂടെ അപേക്ഷിക്കാം. അപേക്ഷയോടൊപ്പം ഫോട്ടോയും പ്രായം, മേൽവിലാസം എന്നിവ തെളിയിക്കുന്ന അംഗീകൃത രേഖകളിൽ ഏതെങ്കിലും ഒന്ന് സമർപ്പിക്കണം. ആധാർ രേഖയായി നൽകുന്നവർ ജനനത്തീയതി തെളിയിക്കുന്ന മറ്റൊരു രേഖയും ഹാജരാക്കണം. അപേക്ഷകളുടെ തുടർപരിശോധനയ്ക്കായി ബൂത്ത് ലെവൽ ഓഫീസർമാർ വീടുകളിലെത്തും.

2025 ജനുവരി ഒന്നിന് നിലവിൽ വന്ന വോട്ടർപട്ടികയും നിയമസഭാ തിരഞ്ഞെടുപ്പിന് തൊട്ടുമുമ്പ് നിലവിലുണ്ടായിരുന്ന പട്ടികയും തമ്മിലുള്ള വ്യത്യാസങ്ങൾ പരിശോധിക്കാൻ ഇലക്ടറൽ രജിസ്ട്രേഷൻ ഓഫീസർമാർക്ക് നിർദേശം നൽകിയിട്ടുണ്ട്. തീവ്ര വോട്ടർപട്ടിക പരിഷ്കരണത്തിനിടെ തിരികെ ലഭിക്കാത്ത അപേക്ഷകളിൽ എത്രയെണ്ണം തിരഞ്ഞെടുപ്പിനുശേഷം പ്രസിദ്ധീകരിച്ച പട്ടികയിൽ ഉൾപ്പെട്ടിട്ടില്ലെന്നും പരിശോധിക്കും.

യുവവോട്ടാക്കൾക്കിടയിൽ തിരഞ്ഞെടുപ്പ് അവബോധം വർധിപ്പിക്കുന്നതിനായി കോളേജുകളിലും ഹയർ സെക്കൻഡറി സ്കൂളുകളിലും ‘ക്യാമ്പസ് ടു ബൂത്ത്’ എന്ന പേരിൽ എൻറോൾമെന്റ് ഡ്രൈവ് സംഘടിപ്പിക്കും. ‘സ്റ്റെപ്പ് ഫോർവേഡ്, ഗെറ്റ് കൗണ്ടഡ്’ എന്ന ടാഗ്‌ലൈനോടെ നവംബർ രണ്ടിന് ആരംഭിക്കുന്ന പരിപാടി ഒരാഴ്ച നീണ്ടുനിൽക്കും. ഇലക്ടറൽ ലിറ്ററസി ക്ലബുകൾ വഴി കൂടുതൽ വിദ്യാർഥികളെ തിരഞ്ഞെടുപ്പ് അവബോധ പ്രവർത്തനങ്ങളിൽ പങ്കാളികളാക്കാനും നടപടിയെടുക്കും.