ന്യൂഡൽഹി: ദീപാവലിക്ക് പുതിയ ജിഎസ്‌ടി പരിഷ്കാരം നടപ്പാക്കുമെന്ന് പ്രധാനമന്ത്രി നരേന്ദ്ര മോദി അറിയിച്ചു. ചെങ്കോട്ടയിൽ ദേശീയ പതാക ഉയർത്തി രാജ്യത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം.

നിത്യോപയോഗ സാധനങ്ങളുടെ ജിഎസ്‌ടി കുറയ്ക്കും. മധ്യവർഗത്തിന്റെ ജീവിതം കൂടുതൽ സുഖകരമാക്കുമെന്നും മോദി പറഞ്ഞു. സ്വകാര്യമേഖലയിൽ ആദ്യ ജോലി ലഭിക്കുന്നവർക്ക് ₹15,000 നൽകി പ്രോത്സാഹിപ്പിക്കും. യുവാക്കൾക്കായി ഒരു ലക്ഷം കോടി രൂപയുടെ പദ്ധതിക്ക് തുടക്കമിടും. പിഎം വികസിത ഭാരത തൊഴിൽ പദ്ധതി വഴി 3.5 കോടി യുവാക്കൾക്ക് പ്രയോജനം ലഭിക്കുമെന്നു അറിയിച്ചു.

മത്സ്യത്തൊഴിലാളികളെയും കർഷകരെയും പിന്നോക്ക വിഭാഗങ്ങളെയും സർക്കാർ കൈവിടില്ലെന്നും അവരുടെ അവകാശങ്ങൾ സംരക്ഷിക്കുമെന്നും അദ്ദേഹം ഉറപ്പ് നൽകി. വിദേശ സോഷ്യൽ മീഡിയ പ്ലാറ്റ്ഫോമുകളെ ആശ്രയിക്കേണ്ട ആവശ്യമില്ലെന്നും രാജ്യത്തിന് സ്വന്തമായി സാമൂഹിക മാധ്യമ പ്ലാറ്റ്ഫോം വേണമെന്നും മോദി അഭിപ്രായപ്പെട്ടു.

രാജ്യം സ്വയംപര്യാപ്തത കൈവരിച്ചതായി പ്രധാനമന്ത്രി ചൂണ്ടിക്കാട്ടി. പ്രതിരോധ, ആണവോർജ, ശൂന്യാകാശ മേഖലകളിൽ വലിയ പുരോഗതിയും പരിഷ്കാരങ്ങളും നടപ്പാക്കിയതായി അദ്ദേഹം പറഞ്ഞു. ഓപ്പറേഷൻ സിന്ദൂർ ഇന്ത്യയുടെ പ്രതിരോധ ശേഷിയും സ്വയംപര്യാപ്തതയും തെളിയിച്ചതായും മോദി കൂട്ടിച്ചേർത്തു.