തുടര്വിദ്യാഭ്യാസത്തിന്റെ സാധ്യതകള് പ്രയോജനപ്പെടുത്തണം: മന്ത്രി എന്. ഷംസുദ്ദീന്
Reporter | Kerala Journal 
തൊടുപുഴ: വിവിധ കാരണങ്ങളാല് പഠനം മുടങ്ങിയവര് തുടര്വിദ്യാഭ്യാസത്തിന്റെ സാധ്യതകള് പ്രയോജനപ്പെടുത്തി വിദ്യാഭ്യാസം പൂര്ത്തിയാക്കണമെന്ന് പൊതുവിദ്യാഭ്യാസ വകുപ്പ് മന്ത്രി അഡ്വ. എന്. ഷംസുദ്ദീന് പറഞ്ഞു. കേരളത്തിലെ വിദ്യാഭ്യാസ മേഖലയില് അനന്തമായ സാധ്യതകളാണുള്ളതെന്നും അദ്ദേഹം വ്യക്തമാക്കി.
ആഗ്രഹിച്ച വിദ്യാഭ്യാസം നേടാന് കഴിയാതെ പോയവര്ക്ക് സാക്ഷരതാ മിഷന്റെ നാലാം ക്ലാസ് മുതല് ഹയര് സെക്കന്ഡറി വരെയുള്ള തുല്യതാ കോഴ്സുകള് പ്രയോജനപ്പെടുത്താം. തുടര്ന്ന് വിവിധ സര്വകലാശാലകളിലെ റഗുലര്, വിദൂര ഡിഗ്രി കോഴ്സുകളില് പഠനം തുടരാനും അവസരമുണ്ടെന്ന് മന്ത്രി പറഞ്ഞു.
തൊടുപുഴ ഉത്രം റെസിഡന്സിയില് നടന്ന ചടങ്ങില് 38കാരനായ വി.എം. മണികണ്ഠനെ സാക്ഷരതാ മിഷന്റെ ഹയര് സെക്കന്ഡറി തുല്യതാ കോഴ്സിലേക്ക് രജിസ്റ്റര് ചെയ്ത് ഇടുക്കി ജില്ലയിലെ തുല്യതാ കോഴ്സ് രജിസ്ട്രേഷന് ക്യാമ്പയിന് മന്ത്രി ഉദ്ഘാടനം ചെയ്തു. ജില്ലാ സാക്ഷരതാ മിഷന് തയ്യാറാക്കിയ പ്രചാരണ പോസ്റ്ററും മന്ത്രി പ്രകാശനം ചെയ്തു.
ചടങ്ങില് അഡ്വ. ഡീന് കുര്യാക്കോസ് എം.പി. അധ്യക്ഷത വഹിച്ചു. അഡ്വ. സിറിയക് തോമസ് എം.എല്.എ., ജില്ലാ പഞ്ചായത്ത് പ്രസിഡന്റ് പ്രൊഫ. ഷീല സ്റ്റീഫന്, തൊടുപുഴ നഗരസഭാ ചെയര്പേഴ്സണ് സാബിറ ജലീല് തുടങ്ങിയവര് പങ്കെടുത്തു. ജില്ലാ സാക്ഷരതാ മിഷന് കോ-ഓഡിനേറ്റര് പി.എം. അബ്ദുള്കരീം ഉള്പ്പെടെയുള്ള ജനപ്രതിനിധികളും ഉദ്യോഗസ്ഥരും ചടങ്ങില് സന്നിഹിതരായിരുന്നു.
.jpg)
