കട്ടപ്പന: ജില്ലയിലെ പ്രധാന ഗതാഗത പാതകളിലൊന്നായ കട്ടപ്പന–പുളിയൻമല റോഡിൽ അപകടഭീഷണി വർധിക്കുകയാണ്. റോഡരികിൽ നിലംപൊത്താറായ നിലയിൽ നിൽക്കുന്ന വൻമരങ്ങളും കാഴ്ച മറയ്ക്കുന്ന പൊന്തക്കാടുകളും യാത്രക്കാരുടെ ജീവന് ഭീഷണിയായി മാറിയിരിക്കുകയാണ്. ബന്ധപ്പെട്ട വകുപ്പുകൾ അടിയന്തരമായി ഇടപെട്ടില്ലെങ്കിൽ ഏത് നിമിഷവും വലിയ ദുരന്തം സംഭവിക്കാമെന്ന ആശങ്കയിലാണ് പ്രദേശവാസികളും വാഹനയാത്രികരും.

ഇന്നലെ റോഡിലൂടെ സഞ്ചരിച്ചുകൊണ്ടിരുന്ന ഒരു വാഹനത്തിന് മുകളിലേക്ക് വൻമരം ഒടിഞ്ഞുവീണ സംഭവം ഭീതി വർധിപ്പിച്ചിട്ടുണ്ട്. ഭാഗ്യവശാൽ വലിയ ജീവഹാനി ഒഴിവായെങ്കിലും അപകടസാധ്യത എത്രത്തോളം ഗുരുതരമാണെന്നതിന് ഈ സംഭവം തെളിവായി മാറി. ഏതാനും ദിവസങ്ങൾക്ക് മുമ്പും മരച്ചില്ലകൾ ഒടിഞ്ഞുവീണ് അപകടം തലനാരിഴയ്ക്ക് ഒഴിവായിരുന്നു.

റോഡിന്റെ പല ഭാഗങ്ങളിലും വർഷങ്ങളായി പരിപാലനമില്ലാതെ നിൽക്കുന്ന വലിയ മരങ്ങൾ അപകടാവസ്ഥയിലാണ്. ശക്തമായ കാറ്റോ മഴയോ ഉണ്ടായാൽ ഇവ റോഡിലേക്ക് പതിക്കാനുള്ള സാധ്യത കൂടുതലാണെന്ന് നാട്ടുകാർ ചൂണ്ടിക്കാട്ടുന്നു. ഇതിനുപുറമേ, റോഡരികിൽ വളർന്നുകിടക്കുന്ന പൊന്തക്കാടുകൾ വളവുകളിലെ കാഴ്ച മറയ്ക്കുന്നതും വാഹനങ്ങൾ തമ്മിൽ നേർക്കുനേർ വരുന്ന സാഹചര്യങ്ങൾ സൃഷ്ടിക്കുന്നതുമാണ്.

മഴക്കാലമായതോടെ പ്രദേശത്ത് അനുഭവപ്പെടുന്ന കനത്ത കോടമഞ്ഞും അപകടസാധ്യത ഇരട്ടിയാക്കുന്നുണ്ട്. കാഴ്ചപരിധി കുറയുന്നതിനാൽ വാഹനമോടിക്കുന്നവർ ഏറെ ബുദ്ധിമുട്ടാണ് നേരിടുന്നത്. ഇതിനിടെ കാഴ്ച മറയ്ക്കുന്ന മരച്ചില്ലകളും കുറ്റിച്ചെടികളും യാത്രയെ കൂടുതൽ അപകടകരമാക്കുകയാണ്.

ഒരു വലിയ ദുരന്തം സംഭവിച്ചശേഷം മാത്രം നടപടി സ്വീകരിക്കുന്ന സമീപനം ഒഴിവാക്കി, ബന്ധപ്പെട്ട വകുപ്പുകൾ സംയുക്തമായി ഇടപെട്ട് കട്ടപ്പന–പുളിയൻമല റോഡിലെ അപകടഭീഷണി എത്രയും വേഗം പരിഹരിക്കണമെന്നാണ് യാത്രക്കാരുടെ ആവശ്യം