കോട്ടയം: മലവെള്ളപ്പാച്ചിലിൽ ജീവനോപാധിയായിരുന്ന 11 പശുക്കളെ നഷ്ടപ്പെട്ട തീക്കോയി മേസ്തിരിപ്പടി സ്വദേശിയായ അനിൽകുമാറിന് ആശ്വാസമായി ക്ഷീര വികസന-മൃഗസംരക്ഷണ വകുപ്പ് മന്ത്രി ബിന്ദു കൃഷ്ണ നാല് പശുക്കൾ കൈമാറി. തിങ്കളാഴ്ച വൈകുന്നേരം അനിൽകുമാറിന്റെ വീട്ടിലെത്തിയാണ് മന്ത്രി എച്ച്.എഫ്. ക്രോസ് ഇനത്തിൽപ്പെട്ട പശുക്കൾ കൈമാറിയത്.

ആകെയുണ്ടായിരുന്ന 17 പശുക്കളിൽ മൂന്ന് കിടാക്കളുൾപ്പെടെ 11 എണ്ണം മലവെള്ളപ്പാച്ചിലിൽ ചത്തൊടുങ്ങുകയായിരുന്നു. സംഭവത്തിന് പിന്നാലെ മന്ത്രി ഫോണിൽ വിളിച്ച് അനിൽകുമാറിനെ ആശ്വസിപ്പിക്കുകയും നേരിട്ട് സന്ദർശിക്കാമെന്ന് ഉറപ്പുനൽകുകയും ചെയ്തിരുന്നു.

കേരള ലൈവ് സ്റ്റോക്ക് ഡെവലപ്മെന്റ് ബോർഡ് നൽകിയ രണ്ട് പശുക്കളും കേരള വെറ്ററിനറി യൂണിവേഴ്സിറ്റി ടീച്ചേഴ്സ് അസോസിയേഷനും കേരള ഗസറ്റഡ് ഓഫീസേഴ്സ് യൂണിയൻ സംസ്ഥാന സമിതിയും നൽകിയ ഓരോ പശുക്കളുമാണ് കൈമാറിയത്. കൂടാതെ, കേരള വെറ്ററിനറി അസോസിയേഷൻ നൽകിയ ഒരു ലക്ഷം രൂപയുടെ ചെക്കും മന്ത്രി അനിൽകുമാറിന് കൈമാറി. വാഗമണ്ണിലെ കെ.എൽ.ഡി.ബി. കേന്ദ്രത്തിൽ നിന്നാണ് പശുക്കളെ എത്തിച്ചത്.

"ദിവസവും 60 ലിറ്റർ പാൽ വിറ്റിരുന്ന ഞാൻ ഇനി എന്ത് ചെയ്യണമെന്നറിയാതെ നിൽക്കുമ്പോഴാണ് മന്ത്രി സഹായവുമായി എത്തിയത്. എന്നെപ്പോലുള്ള ക്ഷീരകർഷകർക്ക് ഇത്തരം ദുരന്തങ്ങൾ താങ്ങാനാവാത്തതാണ്. ഇത്തരം ഘട്ടങ്ങളിൽ സർക്കാർ ഒപ്പമുണ്ടാകുന്നത് വലിയ ആശ്വാസമാണ്," അനിൽകുമാർ പറഞ്ഞു.

അവിവാഹിതനായ അനിൽകുമാർ മാതാപിതാക്കളുടെയും സഹോദരന്റെ കുടുംബത്തിന്റെയും കൂടെയാണ് താമസം. വീടിനോടു ചേർന്നുള്ള തൊഴുത്തിലായിരുന്നു പശുക്കളെ വളർത്തിയിരുന്നത്. വീടിനും കേടുപാടുകൾ സംഭവിച്ച ദുരന്തത്തിൽ നിന്ന് ഇനിയും പൂർണമായി മുക്തനായിട്ടില്ലെങ്കിലും ലഭിച്ച നാല് പശുക്കൾ ജീവിതം വീണ്ടും മുന്നോട്ടുകൊണ്ടുപോകാൻ വലിയ പ്രതീക്ഷയാണെന്ന് അദ്ദേഹം പറഞ്ഞു.