കുന്നംകുളം: തൃശൂർ ജില്ലയിലെ കുന്നംകുളത്ത് നിയന്ത്രണംവിട്ട സ്വകാര്യ ബസ് നിരവധി വാഹനങ്ങളിൽ ഇടിച്ചുകയറി ഉണ്ടായ അപകടത്തിൽ രണ്ട് പേർ മരിച്ചു. കാർ യാത്രക്കാരിയായ റിയ ഫാത്തിമയും സ്വകാര്യ ആശുപത്രിയിൽ ചികിത്സയിലായിരുന്ന മറ്റൊരു സ്ത്രീയുമാണ് മരിച്ചത്. രണ്ടാമത്തെ മരിച്ച സ്ത്രീയുടെ തിരിച്ചറിയൽ ഇതുവരെ സ്ഥിരീകരിച്ചിട്ടില്ല.

ഇന്ന് ഉച്ചയ്ക്ക് 2.15ഓടെ പട്ടാമ്പി റോഡിൽ നടന്ന അപകടത്തിൽ 20-ലധികം പേർക്ക് പരിക്കേറ്റു. പരിക്കേറ്റവരെ കുന്നംകുളത്തെ മലങ്കര ആശുപത്രിയിലും സമീപത്തെ മറ്റ് ആശുപത്രികളിലും പ്രവേശിപ്പിച്ചു.

കോഴിക്കോട് നിന്ന് തൃശൂരിലേക്ക് വരികയായിരുന്ന ലിമിറ്റഡ് സ്റ്റോപ്പ് സ്വകാര്യ ബസാണ് നിയന്ത്രണം വിട്ടത്. ആദ്യം ഒരു കാറിലിടിച്ച ബസ് തുടർന്ന് ബൈക്ക്, വാൻ, ഓട്ടോറിക്ഷ ഉൾപ്പെടെ അഞ്ച് വാഹനങ്ങളിൽ ഇടിച്ചശേഷമാണ് സമീപത്തെ ഒരു വീടിന്റെ മതിലിൽ ഇടിച്ച് നിന്നത്.

ബസ് അമിതവേഗത്തിലായിരുന്നുവെന്നാണ് അപകടത്തിന്റെ ദൃക്സാക്ഷികൾ പറയുന്നത്.