2026ലെ മുഖ്യമന്ത്രിയുടെ പോലീസ് മെഡലുകൾ പ്രഖ്യാപിച്ചു. സ്വാതന്ത്ര്യദിനത്തോടനുബന്ധിച്ച് സ്തുത്യർഹമായ സേവനവും ആത്മാർഥതയും കണക്കിലെടുത്ത് സംസ്ഥാനത്തെ വിവിധ റാങ്കുകളിലുള്ള 281 പോലീസ് ഉദ്യോഗസ്ഥർക്കാണ് മെഡൽ ലഭിക്കുക.

അസിസ്റ്റന്റ് പോലീസ് കമ്മിഷണർ, ഇൻസ്പെക്ടർ, സബ് ഇൻസ്പെക്ടർ, അസിസ്റ്റന്റ് സബ് ഇൻസ്പെക്ടർ, സീനിയർ സിവിൽ പോലീസ് ഓഫീസർ, സിവിൽ പോലീസ് ഓഫീസർ, വനിതാ പോലീസ് ഉദ്യോഗസ്ഥർ തുടങ്ങിയ വിഭാഗങ്ങളിൽപ്പെട്ടവരാണ് പട്ടികയിലുള്ളത്.

സംസ്ഥാന പോലീസ് മേധാവിയുടെയും സംസ്ഥാനതല സ്ക്രീനിങ് കമ്മിറ്റിയുടെയും ശുപാർശകൾ പരിഗണിച്ചാണ് ഉദ്യോഗസ്ഥരെ തെരഞ്ഞെടുത്തത്.

സാധാരണയായി സ്വാതന്ത്ര്യദിനത്തിന്റെ തലേദിവസം പ്രഖ്യാപിക്കാറുള്ള മെഡൽ പട്ടിക ഇത്തവണ വൈകിയാണ് പുറത്തുവന്നത്. ആഭ്യന്തര വകുപ്പിലെ പരിശോധനാ നടപടികളിലുണ്ടായ വീഴ്ചകളാണ് കാലതാമസത്തിന് കാരണമെന്നാണ് റിപ്പോർട്ടുകൾ. മാധ്യമങ്ങളിൽ വാർത്ത വന്നതിനെ തുടർന്ന് ആഭ്യന്തര മന്ത്രി ഇടപെട്ടതോടെയാണ് നടപടികൾ വേഗത്തിലാക്കി പട്ടിക അന്തിമമാക്കിയത്.