സംസ്ഥാനത്ത് പകല്‍ താപനില ക്രമാതീതമായി ഉയര്‍ന്ന സാഹചര്യത്തില്‍ വെയിലത്ത് ജോലി ചെയ്യുന്ന തൊഴിലാളികളുടെ ജോലിസമയം പുനഃക്രമീകരിച്ച് ഉത്തരവ് പുറപ്പെടുവിച്ചു. രാവിലെ ഏഴ് മുതല്‍ വൈകിട്ട് ഏഴ് വരെയുള്ള സമയപരിധിക്കുള്ളില്‍ ജോലിസമയം എട്ട് മണിക്കൂറായി നിജപ്പെടുത്തിയതായി തൊഴില്‍വകുപ്പ് അറിയിച്ചു.

മേയ് 20 വരെയാണ് പുതിയ ക്രമീകരണം പ്രാബല്യത്തില്‍ ഉണ്ടാകുക. ഉച്ചയ്ക്ക് 12 മുതല്‍ വൈകിട്ട് മൂന്ന് വരെ നിര്‍ബന്ധിത വിശ്രമം അനുവദിക്കണമെന്നും ഉത്തരവില്‍ വ്യക്തമാക്കുന്നു.

ഷിഫ്റ്റ് വ്യവസ്ഥയില്‍ ജോലി ചെയ്യുന്ന തൊഴിലാളികള്‍ക്ക് രാവിലെ ഷിഫ്റ്റ് ഉച്ചയ്ക്ക് 12ന് അവസാനിക്കുന്ന തരത്തിലും, ഉച്ചയ്ക്ക് ശേഷമുള്ള ഷിഫ്റ്റ് മൂന്ന് മണിക്ക് ആരംഭിക്കുന്ന തരത്തിലുമാണ് പുതുക്കിയ ക്രമീകരണം.

സമുദ്രനിരപ്പില്‍നിന്ന് 3,000 അടിയിലധികം ഉയരമുള്ളതും സൂര്യാഘാത സാധ്യത കുറവുള്ളതുമായ പ്രദേശങ്ങളെ ഈ ഉത്തരവിന്റെ പരിധിയില്‍നിന്ന് ഒഴിവാക്കിയിട്ടുണ്ട്.