കട്ടപ്പന:ഇടുക്കി ജില്ലയിലെ ഹൈറേഞ്ച് മേഖലയിൽ ആരോഗ്യരംഗത്തെ പ്രതിസന്ധി ദിനംപ്രതി രൂക്ഷമാകുകയാണ്. വിദ്യാഭ്യാസം, വ്യാപാരം, ടൂറിസം, റോഡ് വികസനം തുടങ്ങി പല മേഖലകളിലും മുന്നേറ്റം കൈവരിച്ച കട്ടപ്പന ഉൾപ്പെടെയുള്ള മലയോര പ്രദേശങ്ങൾ, അടിസ്ഥാന ആരോഗ്യ സൗകര്യങ്ങളുടെ കാര്യത്തിൽ ഇപ്പോഴും ഏറെ പിന്നിലാണ് എന്നതാണ് നാട്ടുകാരുടെ പ്രധാന പരാതി. പേരിൽ മാത്രം പ്രവർത്തിക്കുന്ന ആശുപത്രികൾ വർധിച്ചിട്ടുണ്ടെങ്കിലും, അത്യാസന്ന ചികിത്സകൾക്ക് ആവശ്യമായ സജ്ജീകരണങ്ങൾ ഇന്നും മേഖലയിലില്ലെന്നാണ് പൊതുവായ വിമർശനം.

ഹൃദയാഘാതം, ഗുരുതര വാഹനാപകടങ്ങൾ, ബ്രെയിൻ സ്‌ട്രോക്ക്, കരൾ രോഗങ്ങൾ, അടിയന്തര ശസ്ത്രക്രിയകൾ തുടങ്ങിയ സാഹചര്യങ്ങളിൽ രോഗികളെ കോട്ടയം, എറണാകുളം ജില്ലകളിലെ ആശുപത്രികളിലേക്ക് മാറ്റേണ്ട അവസ്ഥ തുടരുകയാണ്. ഹൈറേഞ്ചിൽ നിന്ന് അടുത്തുള്ള അത്യാധുനിക ചികിത്സാ കേന്ദ്രങ്ങളിലെത്താൻ ശരാശരി രണ്ടര മുതൽ മൂന്ന് മണിക്കൂർ വരെ യാത്ര ചെയ്യേണ്ടി വരുന്നത് പലപ്പോഴും രോഗികളുടെ ജീവൻ തന്നെ അപകടത്തിലാക്കുന്ന സാഹചര്യം സൃഷ്ടിക്കുകയാണ്.

“ഗോൾഡൻ അവർ” പോലും നഷ്ടമാകുന്നു

അടിയന്തര ചികിത്സയിൽ ഏറ്റവും നിർണായകമായി കണക്കാക്കപ്പെടുന്നത് “ഗോൾഡൻ അവർ” എന്ന ആദ്യ ഒരു മണിക്കൂറാണ്. എന്നാൽ കട്ടപ്പന, നെടുങ്കണ്ടം, വണ്ടിപ്പെരിയാർ, ഉപ്പുതറ, പീരുമേട്, കുമളി തുടങ്ങിയ മേഖലകളിൽ നിന്നും രോഗികളെ റഫർ ചെയ്യുമ്പോൾ ഈ നിർണായക സമയമാണ് ആദ്യം നഷ്ടമാകുന്നത്. റോഡ് യാത്രയുടെ ദൈർഘ്യം, ആംബുലൻസ് സൗകര്യങ്ങളുടെ പരിമിതി, വഴിയിലുണ്ടാകുന്ന ഗതാഗത തടസ്സങ്ങൾ എന്നിവ ചേർന്നപ്പോൾ അപകടസാധ്യത കൂടുകയാണ്.

പ്രത്യേകിച്ച് രാത്രികാലങ്ങളിൽ രോഗികളെ കോട്ടയത്തെയോ എറണാകുളത്തെയോ ലക്ഷ്യമാക്കി കൊണ്ടുപോകേണ്ടി വരുന്ന അവസ്ഥ കുടുംബങ്ങൾക്കും വലിയ സാമ്പത്തിക-മാനസിക ബാധ്യതയാണ് സൃഷ്ടിക്കുന്നത്.

സ്പെഷ്യാലിറ്റി വിഭാഗങ്ങളുടെ കടുത്ത അഭാവം

ഹൈറേഞ്ച് മേഖലയിലെ ആശുപത്രികളിൽ ജനറൽ മെഡിസിൻ, അടിസ്ഥാന ശസ്ത്രക്രിയ വിഭാഗങ്ങൾ തുടങ്ങിയവ ഉണ്ടെങ്കിലും, ഗ്യാസ്ട്രോ എൻട്രോളജി, ന്യൂറോളജി, കാർഡിയോളജി, നെഫ്രോളജി, ട്രോമ കെയർ, ക്രിറ്റിക്കൽ കെയർ വിഭാഗങ്ങൾ അടക്കമുള്ള സ്പെഷ്യാലിറ്റി ചികിത്സാ സംവിധാനങ്ങളുടെ അഭാവം കടുത്ത പ്രതിസന്ധി സൃഷ്ടിക്കുന്നതായി ആരോഗ്യ പ്രവർത്തകർ ചൂണ്ടിക്കാട്ടുന്നു.

കരൾ സംബന്ധമായ രോഗങ്ങൾ, ദഹന സംബന്ധമായ അസുഖങ്ങൾ, കാൻസർ ചികിത്സ, ഡയാലിസിസ് ആവശ്യങ്ങൾ തുടങ്ങിയവയ്ക്കായി രോഗികൾക്ക് പതിവായി ജില്ലയ്ക്ക് പുറത്തേക്ക് പോകേണ്ടി വരുന്നു. പലപ്പോഴും ഒരു സാധാരണ പരിശോധനയ്ക്കു പോലും ഒരു ദിവസം മുഴുവൻ യാത്രക്കായി ചെലവഴിക്കേണ്ടി വരുന്ന അവസ്ഥയാണ്.

ആരോഗ്യ മേഖലയുമായി ബന്ധപ്പെട്ട പ്രവർത്തകരുടെ വിലയിരുത്തലുകൾ പ്രകാരം ഹൈറേഞ്ച് മേഖലയിലെ ഏകദേശം 30 ശതമാനം രോഗികളും ചികിത്സയ്ക്കായി കോട്ടയം, എറണാകുളം ഉൾപ്പെടെയുള്ള ജില്ലകളിലെ ആശുപത്രികളെ ആശ്രയിക്കുകയാണ്. ഗുരുതര രോഗികളിൽ ഈ ശതമാനം ഇനിയും കൂടുതലാണെന്നാണ് വിലയിരുത്തൽ.

കട്ടപ്പനയിൽ നിരവധി സ്വകാര്യ ആശുപത്രികൾ പ്രവർത്തിക്കുന്നുണ്ടെങ്കിലും, അത്യാധുനിക ഐസിയു സംവിധാനം, 24 മണിക്കൂർ സ്പെഷ്യലിസ്റ്റ് സേവനം, കാത്ത്‌ലാബ് സൗകര്യം, എമർജൻസി ട്രോമ യൂണിറ്റ് തുടങ്ങിയ സംവിധാനങ്ങൾ പരിമിതമാണെന്നാണ് ആരോപണം.

മെഡിക്കൽ കോളജ് ഇപ്പോഴും ശൈശവഘട്ടത്തിൽ,

ഇടുക്കി ചെറുതോണിയിൽ സർക്കാർ മെഡിക്കൽ കോളജ് ആരംഭിച്ചത് ഹൈറേഞ്ച് മേഖലയിലെ ജനങ്ങൾക്ക് വലിയ പ്രതീക്ഷ നൽകിയിരുന്നെങ്കിലും, ഇപ്പോഴും ആശുപത്രി പൂർണ്ണ ശേഷിയിൽ പ്രവർത്തനം ആരംഭിച്ചിട്ടില്ലെന്ന വിമർശനം ശക്തമാണ്. ആവശ്യമായ ഡോക്ടർമാരുടെയും സ്പെഷ്യലിസ്റ്റുകളുടെയും നിയമനം, സൂപർ സ്പെഷ്യാലിറ്റി വിഭാഗങ്ങൾ, മെഡിക്കൽ ഉപകരണങ്ങൾ, കിടക്ക സൗകര്യങ്ങൾ എന്നിവയിൽ ഇനിയും വലിയ കുറവുകളുണ്ടെന്നാണ് ആരോഗ്യ രംഗത്തുള്ളവരുടെ വിലയിരുത്തൽ.

മെഡിക്കൽ കോളജ് പൂർണ്ണമായും പ്രവർത്തനക്ഷമമാകുകയാണെങ്കിൽ ഹൈറേഞ്ചിലെ ആരോഗ്യ മേഖലയ്ക്ക് വലിയ ആശ്വാസമാകുമെന്ന് നാട്ടുകാർ പറയുന്നു.

അപകട മേഖല ആയിട്ടും ട്രോമ കെയർ ഇല്ല

തേയില, കാർഷിക, ടൂറിസം മേഖലകളിൽ ആശ്രയിക്കുന്ന ഹൈറേഞ്ച് മേഖലയിൽ വാഹനാപകടങ്ങളും ജോലി സംബന്ധമായ അപകടങ്ങളും കൂടുതലാണ്. കുമളി, വാഗമൺ, മുണ്ടക്കയം, പുല്ലുപാറ, വണ്ടിപ്പെരിയാർ തുടങ്ങിയ പ്രദേശങ്ങളിലൂടെ ദിവസേന ആയിരക്കണക്കിന് വാഹനങ്ങളാണ് സഞ്ചരിക്കുന്നത്. എന്നാൽ ഗുരുതര അപകടങ്ങളിൽ തൽക്ഷണ ചികിത്സ നൽകാൻ ആവശ്യമായ ട്രോമ കെയർ സെന്ററുകളുടെ അഭാവം വലിയ പോരായ്മയാണെന്ന് വിദഗ്ധർ ചൂണ്ടിക്കാട്ടുന്നു.

ആരോഗ്യരംഗത്ത് അടിയന്തര ഇടപെടൽ വേണമെന്ന് ആവശ്യം

ഹൈറേഞ്ച് മേഖലയിൽ കുറഞ്ഞത് ഒരു മൾട്ടി സൂപർ സ്പെഷ്യാലിറ്റി സർക്കാർ ആശുപത്രിയെങ്കിലും ആരംഭിക്കണമെന്ന ആവശ്യം ശക്തമാകുകയാണ്. കട്ടപ്പനയിലോ സമീപപ്രദേശങ്ങളിലോ ആധുനിക ട്രോമ കെയർ യൂണിറ്റ്, കാർഡിയാക് സെന്റർ, ഗ്യാസ്ട്രോ എൻട്രോളജി വിഭാഗം, കാത്ത്‌ലാബ്, വെന്റിലേറ്റർ സൗകര്യങ്ങൾ ഉൾപ്പെടുന്ന ആരോഗ്യ കേന്ദ്രം ആരംഭിക്കണമെന്നാണ് ജനപ്രതിനിധികൾക്കും സാമൂഹിക പ്രവർത്തകർക്കും നാട്ടുകാർക്കും ഉള്ള ആവശ്യം.

അടിസ്ഥാന ആരോഗ്യസൗകര്യങ്ങൾ പോലും ലഭിക്കാതെ മലയോര ജനങ്ങൾ ഇപ്പോഴും മണിക്കൂറുകൾ നീണ്ട യാത്രകളെ ആശ്രയിക്കേണ്ടി വരുന്ന അവസ്ഥ മാറിയില്ലെങ്കിൽ, ആരോഗ്യരംഗത്തെ ഈ പ്രതിസന്ധി വരുംകാലങ്ങളിൽ കൂടുതൽ ഗുരുതരമാകുമെന്ന മുന്നറിയിപ്പും ഉയരുന്നുണ്ട്.