ഇരട്ടയാർ ഗ്രാമപഞ്ചായത്തിൽ ഒരാൾക്ക് പ്രൈമറി അമീബിക് മെനിംഗോഎൻസഫലൈറ്റിസ് (PAM) സ്ഥിരീകരിച്ചതിനെ തുടർന്ന് ജാഗ്രത നിർദ്ദേശം പുറപ്പെടുവിച്ച് ആരോഗ്യവകുപ്പ്. നൈഗ്ലീരിയ ഫൗളേരി (Naegleria fowleri) എന്ന അമീബ മൂലമാണ് അപൂർവമായെങ്കിലും അതീവ ഗുരുതരമായ ഈ രോഗം ഉണ്ടാകുന്നത്. “മസ്തിഷ്കം തിന്നുന്ന അമീബ” എന്ന പേരിലും ഇത് അറിയപ്പെടുന്നു.

ചൂടേറിയ കുളങ്ങൾ, കെട്ടിക്കിടക്കുന്ന വെള്ളം, ശുദ്ധീകരിക്കാത്ത ജലാശയങ്ങൾ, സുരക്ഷിതമല്ലാത്ത സ്വിമ്മിംഗ് പൂളുകൾ എന്നിവിടങ്ങളിലാണ് സാധാരണയായി ഈ അമീബ കാണപ്പെടുന്നത്. വെള്ളത്തിലൂടെ മൂക്കിലൂടെ ശരീരത്തിലേക്ക് പ്രവേശിക്കുന്ന അമീബ പിന്നീട് മസ്തിഷ്കത്തെ ബാധിച്ച് ഗുരുതര അണുബാധയ്ക്ക് കാരണമാകുന്നു. വെള്ളം കുടിക്കുന്നതിലൂടെ രോഗം പകരില്ലെന്നാണ് ആരോഗ്യ വിദഗ്ധർ വ്യക്തമാക്കുന്നത്.

കടുത്ത തലവേദന, പനി, ഛർദ്ദി, കഴുത്ത് മുറുകൽ എന്നിവയാണ് രോഗത്തിന്റെ ആദ്യഘട്ട ലക്ഷണങ്ങൾ. തുടർന്ന് ബോധക്ഷയം, അപസ്മാരം, ആശയക്കുഴപ്പം തുടങ്ങിയ ഗുരുതര ലക്ഷണങ്ങളിലേക്കും രോഗം അതിവേഗം മാറാൻ സാധ്യതയുണ്ട്. രോഗം അപൂർവമാണെങ്കിലും മരണസാധ്യത കൂടുതലായതിനാൽ ആരോഗ്യവകുപ്പ് പ്രത്യേക ജാഗ്രത നിർദേശം പുറപ്പെടുവിച്ചു.

മഴക്കാല സാഹചര്യത്തിൽ കുട്ടികൾ ഉൾപ്പെടെ ആരും കെട്ടിക്കിടക്കുന്ന വെള്ളത്തിലോ സുരക്ഷിതമല്ലാത്ത കുളങ്ങളിലോ ഇറങ്ങരുതെന്ന് ആരോഗ്യ പ്രവർത്തകർ മുന്നറിയിപ്പ് നൽകി. മൂക്കിലേക്ക് വെള്ളം ശക്തമായി കയറുന്ന രീതിയിൽ മുങ്ങിക്കുളിക്കുന്നത് ഒഴിവാക്കണം. ശുദ്ധമല്ലാത്ത വെള്ളത്തിൽ നീന്തുമ്പോൾ മൂക്ക് മൂടാനുള്ള ഉപകരണം ഉപയോഗിക്കുന്നതടക്കമുള്ള മുൻകരുതലുകൾ സ്വീകരിക്കണമെന്നും നിർദേശമുണ്ട്.

സംശയാസ്പദമായ ലക്ഷണങ്ങൾ കണ്ടാൽ ഉടൻ ചികിത്സ തേടണമെന്ന് ആരോഗ്യ വിദഗ്ധർ അഭ്യർത്ഥിച്ചു.