തൊടുപുഴ നഗരസഭയിലെ ഭരണസ്തംഭനത്തിനും വികസന പ്രവർത്തനങ്ങളിലെ കാലതാമസത്തിനുമെതിരെ സിപിഎം നേതൃത്വത്തിൽ പ്രതിഷേധ മാർച്ചും ധർണയും സംഘടിപ്പിച്ചു. വെള്ളിയാഴ്ച രാവിലെ തൊടുപുഴ വെസ്റ്റ് ഏരിയ കമ്മിറ്റി ഓഫീസിന് സമീപത്ത് നിന്ന് ആരംഭിച്ച പ്രകടനം ഗാന്ധി സ്ക്വയർ വഴി നഗരസഭാ ഓഫീസിന് മുന്നിൽ സമാപിച്ചു. നൂറുകണക്കിന് പ്രവർത്തകർ പ്രതിഷേധത്തിൽ പങ്കെടുത്തു.

തുടർന്ന് നടന്ന ധർണ സിപിഎം ജില്ലാ സെക്രട്ടറി സി.വി. വർഗീസ് ഉദ്ഘാടനം ചെയ്തു. തൊടുപുഴ ഈസ്റ്റ് ഏരിയ സെക്രട്ടറി ലിനു ജോസ് അധ്യക്ഷത വഹിച്ചു. സംസ്ഥാന കമ്മിറ്റി അംഗം കെ.പി. മേരി, ജില്ലാ സെക്രട്ടേറിയറ്റ് അംഗം മുഹമ്മദ് ഫൈസൽ, ജില്ലാ കമ്മിറ്റി അംഗങ്ങളായ വി.വി. മത്തായി, ടി.ആർ. സോമൻ എന്നിവർ സംസാരിച്ചു.

ഉദ്ഘാടന പ്രസംഗത്തിൽ സി.വി. വർഗീസ്, അധികാരത്തിലെത്തി ഏഴ് മാസം പിന്നിട്ടിട്ടും നഗരസഭയിൽ വികസന പദ്ധതികൾ നടപ്പാക്കുന്നതിൽ യു.ഡി.എഫ് ഭരണസമിതി പരാജയപ്പെട്ടുവെന്ന് ആരോപിച്ചു. ജനങ്ങൾക്ക് നൽകിയ വാഗ്ദാനങ്ങൾ പാലിക്കാതെ ആഭ്യന്തര തർക്കങ്ങളിലും സ്ഥാനവിഭജനത്തിലുമാണ് ഭരണസമിതി ശ്രദ്ധ കേന്ദ്രീകരിക്കുന്നതെന്നും അദ്ദേഹം വിമർശിച്ചു.

തദ്ദേശ സ്ഥാപനങ്ങൾക്കുള്ള പദ്ധതി വിഹിതം സർക്കാർ വെട്ടിക്കുറച്ചെന്നും, തനത് ഫണ്ട് ഉപയോഗിച്ച് വികസന പ്രവർത്തനങ്ങൾ നടത്തേണ്ട സാഹചര്യം സൃഷ്ടിച്ചെന്നും അദ്ദേഹം ആരോപിച്ചു. എൽ.ഡി.എഫ് ഭരണകാലത്ത് നഗരത്തിൽ നിരവധി വികസന പദ്ധതികൾ നടപ്പാക്കിയിരുന്നുവെന്നും, ബി.ജെ.പിയുടെയും യു.ഡി.എഫിന്റെയും കൂട്ടുകെട്ടാണ് ആ ഭരണത്തെ അട്ടിമറിച്ചതെന്നും അദ്ദേഹം പറഞ്ഞു.

യു.ഡി.എഫ് ഭരണത്തിൽ വിലപേശലുകളും കെടുകാര്യസ്ഥതയും മൂലം പ്രധാന തസ്തികകളിൽ പോലും ജീവനക്കാരില്ലാത്ത അവസ്ഥയാണുള്ളതെന്നും, നഗരസഭയിലെ അഴിമതിക്കും ഭരണവീഴ്ചകൾക്കും എതിരായ ജനകീയ പ്രതിഷേധം തുടരുമെന്നും സി.പി.എം നേതൃത്വം വ്യക്തമാക്കി.