മൂന്നാർ: മുല്ലപ്പെരിയാർ അണക്കെട്ട് വിഷയത്തിൽ കേരളവും തമിഴ്നാടും തമ്മിലുള്ള അന്തർസംസ്ഥാന ചർച്ച ഇന്ന് മൂന്നാറിൽ നടക്കും. ജലവിഭവ വകുപ്പുകളിലെ സെക്രട്ടറിമാരും ഇരുസംസ്ഥാനങ്ങളുടെയും പ്രതിനിധികളും പങ്കെടുക്കുന്ന യോഗം മൂന്നാർ വൈബ് റിസോർട്ടിലാണ് ചേരുന്നത്.

ജലവിഭവ-പാർലമെന്ററി സ്റ്റാൻഡിങ് കമ്മിറ്റിയുടെ നേതൃത്വത്തിൽ നടക്കുന്ന ചർച്ചയ്ക്ക് കമ്മിറ്റി ചെയർമാൻ രാജീവ് പ്രതാപ് എംപി അധ്യക്ഷത വഹിക്കും. പാർലമെന്ററി കമ്മിറ്റി അംഗങ്ങളായ എംപിമാരായ ഡീൻ കുര്യാക്കോസ്, ജെബി മേത്തർ എന്നിവരും യോഗത്തിൽ പങ്കെടുക്കും.

മുല്ലപ്പെരിയാർ അണക്കെട്ടിന്റെ സുരക്ഷ, ജലനിരപ്പ്, പുതിയ അണക്കെട്ടിന്റെ നിർമാണം തുടങ്ങിയ നിർണായക വിഷയങ്ങളാണ് ചർച്ചയാകുന്നത്. പതിറ്റാണ്ടുകളായി തുടരുന്ന കേരളം-തമിഴ്നാട് തർക്കത്തിൽ പരിഹാര മാർഗങ്ങൾ തേടുന്നതിനായാണ് യോഗം സംഘടിപ്പിക്കുന്നത്.

മുല്ലപ്പെരിയാറിൽ പുതിയ അണക്കെട്ട് നിർമിക്കണമെന്ന കേരളത്തിന്റെ ആവശ്യം പാർലമെന്ററി കമ്മിറ്റിക്ക് മുന്നിൽ ശക്തമായി അവതരിപ്പിക്കുമെന്ന് മന്ത്രി മോൻസ് ജോസഫ് വ്യക്തമാക്കി. ജനങ്ങളുടെ സുരക്ഷയാണ് കേരളത്തിന്റെ പ്രധാന പരിഗണനയെന്നും നിലവിലെ അണക്കെട്ടിന്റെ സുരക്ഷ സംബന്ധിച്ച ആശങ്കകൾ പരിഗണിച്ചാണ് പുതിയ അണക്കെട്ട് എന്ന നിലപാട് സംസ്ഥാനം സ്വീകരിച്ചതെന്നും മന്ത്രി പറഞ്ഞു.

മൂന്നാറിൽ നടക്കുന്ന ചർച്ച തുടർ നടപടികൾക്ക് വഴിയൊരുക്കുമെന്നാണ് പ്രതീക്ഷയെന്നും ഇരുസംസ്ഥാനങ്ങളും പരസ്പര ബഹുമാനത്തോടെ വിഷയത്തെ സമീപിക്കുമെന്നാണ് കരുതുന്നതെന്നും മന്ത്രി കൂട്ടിച്ചേർത്തു.

മുല്ലപ്പെരിയാർ വിഷയത്തിൽ കേരളത്തിന്റെ ഔദ്യോഗിക നിലപാട് പാർലമെന്ററി കമ്മിറ്റിക്ക് മുന്നിൽ വ്യക്തമായി അവതരിപ്പിക്കുമെന്നും ജനങ്ങളുടെ ജീവനും സ്വത്തിനും സുരക്ഷ ഉറപ്പാക്കുന്ന പരിഹാരമാണ് സർക്കാരിന്റെ ലക്ഷ്യമെന്നും മന്ത്രി വ്യക്തമാക്കി.