നെടുങ്കണ്ടം : പ്രൗഡോജ്വലമായ വിശ്വാസ പ്രഘോഷണ റാലിയോടെ ഇടുക്കി രൂപതയിലെ ക്രിസ്‌തു ജയന്തി മഹാജൂബിലി വർഷാചരണത്തിന് ഇന്നലെ സമാപനമായി. 2025-ാം വാർഷികത്തോടനുബന്ധിച്ച് ഫ്രാൻസിസ് മാർപാപ്പ പ്രഖ്യാപിച്ച ജൂബിലി വർഷാചരണത്തിന്റെ രൂപതാതല സമാപനമാണ് നെടുങ്കണ്ടത്ത് നടന്നത്.

ആഗോള സഭയിൽ ജനുവരി ആറിന് ദനഹാ തിരുനാളിനോടനുബന്ധിച്ച് റോമിലെ സെന്റ് പീറ്റേഴ്‌സ് ബസിലിക്കയിലെ വിശുദ്ധ കവാടം അടയ്ക്കുന്നതോടെയാണ് ജൂബിലി വർഷത്തിന് ഔപചാരിക സമാപനമാകുന്നത്.

ഇന്നലെ രാവിലെ രൂപതാ മെത്രാൻ മാർ ജോൺ നെല്ലിക്കുന്നേൽയുടെ നേതൃത്വത്തിൽ നെടുങ്കണ്ടം സെന്റ് സെബാസ്റ്റ്യൻസ് മേജർ ആർക്ക്‌എപ്പിസ്കോപ്പൽ ദൈവാലയത്തിൽ നടന്ന പൊന്തിഫിക്കൽ കുർബ്ബാനയോടെയാണ് ആഘോഷ പരിപാടികൾക്ക് തുടക്കമായത്.

ഉച്ചകഴിഞ്ഞ് മൂന്ന് മണിക്ക് കോതമംഗലം രൂപതാ മെത്രാൻ മാർ ജോർജ് മഠത്തിക്കണ്ടത്തിൽ ആമുഖ സന്ദേശം നൽകി ഉദ്ഘാടനം ചെയ്ത വിശ്വാസ പ്രഘോഷണ റാലി അക്ഷരാർത്ഥത്തിൽ വിശ്വാസ കടലായി മാറി. ആയിരങ്ങൾ പങ്കെടുത്ത റാലി മണിക്കൂറുകൾ കഴിഞ്ഞാണ് സമാപിച്ചത്.

രൂപതാ മെത്രാൻ മാർ ജോൺ നെല്ലിക്കുന്നേൽ കുരിശ് വഹിച്ച് നേതൃത്വം നൽകിയ റാലിയുടെ മുൻനിരയിൽ മെത്രാന്മാരായ മാർ ജോർജ് മഠത്തിക്കണ്ടത്തിൽ, മാർ ജോസഫ് അരുമച്ചാടത്ത്, മാർ മാത്യു നെല്ലിക്കുന്നേൽ, മാർ ജോസഫ് തച്ചാപറമ്പത്ത് എന്നിവർ അണിനിരന്നു. തുടർന്ന് രൂപതയിലെ വൈദീകരും വിവിധ സന്യാസ സഭകളിലെ അംഗങ്ങളും ഭക്ത സംഘടനകളും വിവിധ ഫൊറോനകളിൽ നിന്നുള്ള വിശ്വാസികളും റാലിയിൽ പങ്കെടുത്തു.

നിശ്ചല ദൃശ്യങ്ങൾ, വാദ്യമേളങ്ങൾ, പരമ്പരാഗത ക്രൈസ്തവ കലാരൂപങ്ങളുടെ അവതരണങ്ങൾ, പരമ്പരാഗത ക്രൈസ്തവ വേഷധാരികളായി എത്തിയ വിശ്വാസികൾ എന്നിവ റാലിക്ക് പ്രത്യേക ഭംഗി പകർന്നു