അടിമാലി: അടിമാലി ഗ്രാമപഞ്ചായത്തിൽ സമഗ്ര ശുചിത്വ മുന്നേറ്റ പദ്ധതിയായ **'ക്ലീൻ അടിമാലി'**യ്ക്ക് മുന്നോടിയായി പദ്ധതി പങ്കാളിത്ത യോഗം ചേർന്നു. ഗ്രാമപഞ്ചായത്തിന്റെ നേതൃത്വത്തിൽ ഓർക്കല ഇന്ത്യ (ഈസ്റ്റേൺ) ഗ്രൂപ്പ്, സെർവ് റൂറൽ, ഗ്രീൻ വേംസ് എന്നിവയുടെ സഹകരണത്തോടെയാണ് പദ്ധതി നടപ്പാക്കുന്നത്.

ഓർക്കല ഇന്ത്യ (ഈസ്റ്റേൺ) ഗ്രൂപ്പിന്റെ കോർപ്പറേറ്റ് സോഷ്യൽ റെസ്‌പോൺസിബിലിറ്റി (CSR) ഫണ്ടിൽ നിന്ന് മൂന്ന് കോടി രൂപ പദ്ധതിക്കായി വിനിയോഗിക്കും. കൂടാതെ, അടിമാലിയിലെ ജലശുദ്ധീകരണത്തിനായി 25 ലക്ഷം രൂപയുടെ പദ്ധതിയും കമ്പനി നടപ്പാക്കുന്നുണ്ട്.

മൂന്ന് വർഷം കൊണ്ട് മൂന്ന് ഘട്ടങ്ങളിലായി നടപ്പാക്കുന്ന പദ്ധതിയുടെ ഭാഗമായി ശാസ്ത്രീയ മാലിന്യ സംസ്കരണം, ഹരിതകർമ്മസേനയുടെ തൊഴിൽ സാഹചര്യവും വരുമാനവും മെച്ചപ്പെടുത്തൽ, വീടുകളിലും സ്ഥാപനങ്ങളിലും മാലിന്യ സംസ്കരണം പ്രോത്സാഹിപ്പിക്കൽ, പൊതുസ്ഥലങ്ങളും വിനോദസഞ്ചാര കേന്ദ്രങ്ങളും ശുചീകരിക്കൽ, പുനരുപയോഗം പ്രോത്സാഹിപ്പിക്കുന്ന ബോധവത്കരണം, ടൗൺ സൗന്ദര്യവത്കരണം എന്നിവ നടപ്പാക്കും.

അടിമാലിയെ മാതൃക ശുചിത്വ പഞ്ചായത്താക്കി മാറ്റുക എന്നതാണ് പദ്ധതിയുടെ പ്രധാന ലക്ഷ്യം.

പദ്ധതിക്ക് അന്തിമനാമം ഇതുവരെ നിശ്ചയിച്ചിട്ടില്ല. പൊതുജനങ്ങളിൽ നിന്ന് മികച്ച പേര് ക്ഷണിച്ചിട്ടുണ്ടെന്നും തിരഞ്ഞെടുക്കപ്പെടുന്ന പേര് നിർദേശിക്കുന്നവർക്ക് പഞ്ചായത്ത് സമ്മാനം നൽകുമെന്നും അധികൃതർ അറിയിച്ചു.

അടിമാലി ഗ്രാമപഞ്ചായത്ത് ടൗൺഹാളിൽ നടന്ന യോഗത്തിൽ പഞ്ചായത്ത് പ്രസിഡന്റ് ബാബു പി. കുര്യാക്കോസ് അധ്യക്ഷത വഹിച്ചു. വൈസ് പ്രസിഡന്റ് റൈഹാനത്ത് ഷുക്കൂർ, ബ്ലോക്ക് പഞ്ചായത്ത് വൈസ് പ്രസിഡന്റ് മഞ്ജു ബിജു, ജനപ്രതിനിധികൾ, ഉദ്യോഗസ്ഥർ, വ്യാപാരി-വ്യവസായി പ്രതിനിധികൾ, സ്കൂൾ പ്രിൻസിപ്പൽമാർ, രാഷ്ട്രീയകക്ഷി പ്രതിനിധികൾ, ഹരിതകർമ്മസേന അംഗങ്ങൾ എന്നിവർ പങ്കെടുത്തു. സെർവ് റൂറലിന്റെ അഡ്മിനിസ്ട്രേഷൻ ആൻഡ് ഓപ്പറേഷൻസ് ഹെഡ് മുസമ്മിൽ പദ്ധതി വിശദീകരിച്ചു.