ചെറുതോണി: നീറ്റ് പരീക്ഷ ഉൾപ്പെടെ ദേശീയ പരീക്ഷകൾ കാര്യക്ഷമമായി നടത്തുന്നതിൽ എൻ.ടി.എ പരാജയപ്പെട്ട സാഹചര്യത്തിൽ ധാർമ്മിക ഉത്തരവാദിത്തം ഏറ്റെടുത്ത് കേന്ദ്ര വിദ്യാഭ്യാസമന്ത്രി ധർമേന്ദ്ര പ്രധാൻ രാജിവെക്കണമെന്ന് ഡി.സി.സി പ്രസിഡന്റ് സി.പി. മാത്യു ആവശ്യപ്പെട്ടു.

നീറ്റ് പരീക്ഷയിലെ ക്രമക്കേടുകളിൽ പ്രതിഷേധിച്ച് കോൺഗ്രസ് സംഘടിപ്പിച്ച ജില്ലാതല പ്രതിഷേധ പരിപാടി ചെറുതോണിയിൽ ഉദ്ഘാടനം ചെയ്യുകയായിരുന്നു അദ്ദേഹം.

വിദ്യാർത്ഥികളുടെ സമരത്തിന് ഐക്യദാർഢ്യം പ്രഖ്യാപിച്ച് പ്രധാനമന്ത്രി നരേന്ദ്ര മോദിയുടെ വസതിക്കു മുന്നിൽ പ്രതിഷേധിച്ച പ്രതിപക്ഷ നേതാവ് രാഹുൽ ഗാന്ധി, എ.ഐ.സി.സി ജനറൽ സെക്രട്ടറിമാരായ പ്രിയങ്കാ ഗാന്ധി, കെ.സി. വേണുഗോപാൽ എം.പി., ഡീൻ കുര്യാക്കോസ് എം.പി. എന്നിവരുള്‍പ്പെടെയുള്ള നേതാക്കൾക്കും ജനപ്രതിനിധികൾക്കും നേരെ കേന്ദ്രസേനയും ഡൽഹി പൊലീസും നടത്തിയ നടപടികൾ പ്രതിഷേധാർഹവും അപലപനീയവുമാണെന്നും അദ്ദേഹം പറഞ്ഞു.

എം.ഡി. അർജുനൻ അധ്യക്ഷത വഹിച്ച യോഗത്തിൽ എ.പി. ഉസ്മാൻ, ആഗസ്തി അഴകത്ത്, എൻ. പുരുഷോത്തമൻ, അനീഷ് ജോർജ്, ഫ്രാൻസിസ് അറയ്ക്കപ്പറമ്പിൽ, പി.ഡി. ജോസഫ്, സി.പി. സലിം, ജോബി തയ്യിൽ, ആൻസി തോമസ്, ജിപ്സി ജിമ്മി, റോയി കൊച്ചുപുര, തങ്കച്ചൻ വേമ്പേനി, കെ.എം. ജലാലുദ്ദീൻ, എസ്. ശ്രീലാൽ എന്നിവർ പ്രസംഗിച്ചു.