തൊടുപുഴ: കെഎസ്‌ആർടിസി സ്റ്റാൻഡിൽ യാത്രക്കാരനെ ജീവനക്കാർ ക്രൂരമായി മർദിച്ചതായി പരാതി. മൂന്ന് ജീവനക്കാർ ചേർന്ന് യാത്രക്കാരനെ മർദിക്കുന്നതിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്.

സംഭവത്തിൽ കെഎസ്‌ആർടിസി അധികൃതർ വിശദീകരണവുമായി രംഗത്തെത്തി. മർദനമേറ്റ യാത്രക്കാരൻ മദ്യപിച്ച നിലയിൽ ബസിനുള്ളിൽ ബഹളം ഉണ്ടാക്കിയതിനെ തുടർന്നാണ് സംഘർഷമുണ്ടായതെന്നാണ് അധികൃതരുടെ വിശദീകരണം. മർദനത്തിൽ പങ്കെടുത്തവർ ഇടുക്കി യൂണിറ്റിലെ ജീവനക്കാരല്ലെന്നും മറ്റ് ഡിപ്പോകളിൽ നിന്നുള്ളവരാണെന്നും പ്രാഥമികമായി അറിയിച്ചു.

ദൃശ്യങ്ങൾ പുറത്തുവന്നിട്ടുണ്ടെങ്കിലും മർദനമേറ്റ യാത്രക്കാരൻ ഇതുവരെ പൊലീസിൽ പരാതി നൽകിയിട്ടില്ല. പരാതിയില്ലാത്തതിനാൽ നിലവിൽ പൊലീസ് കേസെടുത്തിട്ടില്ല.

എന്നാൽ സംഭവം ഗൗരവകരമാണെന്നും ദൃശ്യങ്ങളുടെ അടിസ്ഥാനത്തിൽ വകുപ്പുതല അന്വേഷണം ആരംഭിച്ചതായും ഇടുക്കി ഡിടിഒ (DTO) അറിയിച്ചു.