പുളിയന്മല: ഏലം കാർഷിക മേഖലയിലെ ഭൂപ്രശ്നങ്ങളും നിയമപരവും ഭരണപരവുമായ വെല്ലുവിളികളും ചർച്ച ചെയ്യുന്നതിനായി 'ഏലം കോൺക്ലേവ്–2026' സംഘടിപ്പിക്കുന്നു. പുളിയന്മല പ്ലാന്റേഴ്സ് ക്ലബിന്റെ 25-ാം വാർഷികാഘോഷങ്ങളുടെ ഭാഗമായാണ് കോൺക്ലേവ് നടക്കുന്നത്.

ഏലം കർഷക സംഘടനകൾ, ലേല ഏജൻസികൾ, അഗ്രോ ഇൻപുട്ട് അസോസിയേഷനുകൾ എന്നിവയുടെ സഹകരണത്തോടെയാണ് പരിപാടി സംഘടിപ്പിക്കുന്നത്. സി.എച്ച്.ആർ മേഖലയിലെ മുഴുവൻ ഏലം കർഷക സംഘടനകളും അനുബന്ധ സംഘടനകളും ഒരുമിച്ച് കാർഷിക മേഖലയിലെ പ്രതിസന്ധികൾ ചർച്ച ചെയ്യുന്നതിനായി ആദ്യമായാണ് ഇത്തരമൊരു വേദി ഒരുക്കുന്നതെന്ന് സംഘാടകർ വാർത്താസമ്മേളനത്തിൽ അറിയിച്ചു.

ജൂലൈ 27ന് വൈകിട്ട് 3 മണിക്ക് പുളിയന്മല ഗ്രീൻ ഹൗസ് ഓഡിറ്റോറിയത്തിൽ നടക്കുന്ന പ്രത്യേക സമ്മേളനത്തിൽ റവന്യൂ മന്ത്രി എ.പി. അനിൽകുമാർ, ഗവ. ചീഫ് വിപ്പ് അപ്പു ജോൺ ജോസഫ്, എം.എൽ.എമാരായ റോയി കെ. പൗലോസ്, അഡ്വ. സേനാപതി വേണു, അഡ്വ. സിറിയക് തോമസ്, എഫ്. രാജ, ഇടുക്കി ജില്ലാ കളക്ടർ ഡോ. ദിനേശൻ ചെറുവാട്ട്, മുൻ ചീഫ് സെക്രട്ടറിമാരായ സിറിയക് തോമസ് (കേരളം), പി.സി. സിറിയക് (തമിഴ്നാട്), കേരള റവന്യൂ സെക്രട്ടറി, വിവിധ പഞ്ചായത്ത് പ്രസിഡന്റുമാർ, നിയമവിദഗ്ധർ തുടങ്ങിയവർ പങ്കെടുക്കും.

നാല് നൂറ്റാണ്ടിലേറെ പഴക്കമുള്ള സി.എച്ച്.ആർ മേഖലയിലെ ഏലം കൃഷി നേരിടുന്ന നിയമപരവും ഭരണപരവുമായ പ്രശ്നങ്ങൾ, കോടതി വ്യവഹാരങ്ങൾ, നിയമനിർമാണത്തിന്റെ ആവശ്യകത, പരിഹാരസാധ്യതകൾ എന്നിവ കോൺക്ലേവിൽ വിശദമായി ചർച്ച ചെയ്യും.

ഏലം കൃഷിക്കായി അനുവദിച്ച ഭൂമിയുടെ ഉടമസ്ഥാവകാശം, കുത്തകപ്പാട്ടത്തിൽ നൽകിയ തോട്ടങ്ങളുടെ പാട്ടം പുതുക്കൽ, നിർമാണ വിലക്കുകൾ എന്നിവ അടിയന്തര പരിഹാരം ആവശ്യമായ പ്രധാന വിഷയങ്ങളാണെന്ന് സംഘാടകർ ചൂണ്ടിക്കാട്ടി. ചർച്ചകളിൽ നിന്നുള്ള അഭിപ്രായങ്ങളും വിദഗ്ധ നിർദേശങ്ങളും ക്രോഡീകരിച്ച് സർക്കാരിന് സമർപ്പിക്കും.

സ്വാതന്ത്ര്യാനന്തര ഇന്ത്യയിൽ നിലവിലുള്ള രാജഭരണകാല നിയമങ്ങളുടെയും ഭേദഗതി ആവശ്യമായ കർഷകവിരുദ്ധ വ്യവസ്ഥകളുടെയും വിശകലനവും കോൺക്ലേവിൽ നടക്കും. ഇതിന്റെ അടിസ്ഥാനത്തിൽ സംസ്ഥാന സർക്കാരുമായി തിരുവനന്തപുരത്ത് തുടർചർച്ചകൾ നടത്തുമെന്നും പുളിയന്മല പ്ലാന്റേഴ്സ് ക്ലബ് പ്രസിഡന്റ് സിബി ഏബ്രഹാം, സെക്രട്ടറി റോബി ജോസഫ് എന്നിവരുള്‍പ്പെടെയുള്ള സംഘാടകർ അറിയിച്ചു.