ഇടുക്കി: അടിമാലി മണ്ണിടിച്ചിലിൽ ദുരിതമനുഭവിച്ച കുടുംബങ്ങൾക്ക് ഓണത്തിന് മുൻപ് 10 ലക്ഷം വീതം നഷ്ടപരിഹാരം വിതരണം ചെയ്യുമെന്ന് റവന്യൂ വകുപ്പ് മന്ത്രി എ.പി. അനിൽകുമാർ അറിയിച്ചു. ഇടുക്കി കളക്ടറേറ്റിൽ നടന്ന റവന്യൂ വകുപ്പ് അവലോകന യോഗത്തിന് ശേഷമാണ് മന്ത്രി ഇക്കാര്യം വ്യക്തമാക്കിയത്.

ഉദ്യോഗസ്ഥ തലത്തിലുള്ള വീഴ്ചകൾ കാരണം പൊതുജനങ്ങളിൽ നിന്ന് പരാതികൾ ഉണ്ടാകാൻ പാടില്ലെന്നും മന്ത്രി നിർദേശിച്ചു. ഇടുക്കിയിലെ സങ്കീർണമായ ഭൂപ്രശ്നങ്ങൾ പരിഹരിക്കാൻ സർക്കാർ നടപടികൾ സ്വീകരിച്ചുവരികയാണെന്നും, 60 വർഷത്തിലേറെ പഴക്കമുള്ള ഭൂനിയമങ്ങൾ കാലാനുസൃതമായി പരിഷ്‌കരിക്കാൻ വിദഗ്ധ സമിതിയെ നിയോഗിക്കുമെന്നും അദ്ദേഹം പറഞ്ഞു. രണ്ടാം ഭൂപരിഷ്‌കരണ നിയമം നടപ്പാക്കുകയാണ് സർക്കാരിന്റെ ലക്ഷ്യമെന്നും, അർഹരായവർക്ക് പട്ടയം ലഭ്യമാക്കുന്നതിനുള്ള തടസ്സങ്ങൾ നീക്കുമെന്നും മന്ത്രി വ്യക്തമാക്കി.

ജില്ലയിൽ റവന്യൂ വകുപ്പിന്റെ പ്രവർത്തനം കൂടുതൽ കാര്യക്ഷമമാക്കാൻ അധിക വാഹനങ്ങളും സർവേയർമാരെയും അനുവദിക്കുമെന്ന് മന്ത്രി അറിയിച്ചു. ഇടുക്കിയിൽ ജോലി ചെയ്യുന്ന ഉദ്യോഗസ്ഥർക്കായി ക്വാർട്ടേഴ്‌സ് ഉൾപ്പെടെയുള്ള സൗകര്യങ്ങൾ മെച്ചപ്പെടുത്തുന്നതും പരിഗണിക്കും.

ജില്ലാ കളക്ടർ ഡോ. ദിനേശൻ ചെറുവാട്ട് അവതരിപ്പിച്ച കണക്കുകൾ പ്രകാരം, 2011 മുതൽ 54,485 എൽ.എ. പട്ടയങ്ങളും 258 എൽ.ടി. പട്ടയങ്ങളും 4,421 മിച്ചഭൂമി പട്ടയങ്ങളും വിതരണം ചെയ്തു. നിലവിൽ 55,214 എൽ.എ. പട്ടയ അപേക്ഷകളും 237 എൽ.ടി. പട്ടയ അപേക്ഷകളും തീർപ്പാക്കാനുണ്ട്.

ജില്ലയിൽ ഡിജിറ്റൽ സർവേ 13.07 ശതമാനം പൂർത്തിയായിട്ടുണ്ട്. ആകെ 68 വില്ലേജുകളിൽ 44 വില്ലേജുകളിൽ സർവേ പുരോഗമിക്കുമ്പോൾ ആറു വില്ലേജുകളിൽ സർവേ പൂർത്തിയായി. ശേഷിക്കുന്ന പ്രദേശങ്ങളിലെ സർവേ നടപടികൾ വേഗത്തിലാക്കാൻ മന്ത്രി നിർദേശം നൽകി.

ദുരന്തനിവാരണവുമായി ബന്ധപ്പെട്ട് 2022 മുതൽ 804 അപേക്ഷകൾക്ക് ധനസഹായം അനുവദിച്ചിട്ടുണ്ടെന്നും, ഇനി 125 അപേക്ഷകൾ കൂടി തീർപ്പാക്കാനുണ്ടെന്നും യോഗത്തിൽ അറിയിച്ചു. സർക്കാർ ഭൂമി കൈയേറുന്നവർക്കെതിരെ കർശന നടപടി തുടരുമെന്നും മന്ത്രി മുന്നറിയിപ്പ് നൽകി.