ഇടുക്കി: ഓണക്കാലം സുരക്ഷിതമാക്കാൻ "സുരക്ഷിത ആഹാരത്തിലൂടെ സമൃദ്ധമായ ഓണാഘോഷത്തിലേക്ക്" എന്ന ലക്ഷ്യത്തോടെ ഭക്ഷ്യസുരക്ഷാ വകുപ്പ് വിവിധ പദ്ധതികൾ നടപ്പാക്കുന്നു. പദ്ധതികളുടെ ജില്ലാതല ഉദ്ഘാടനം ജൂലൈ 28-ന് രാവിലെ 9.30ന് തടിയമ്പാട് ഇടുക്കി കാസിൽ ഹോട്ടലിൽ റോയി കെ. പൗലോസ് എം.എൽ.എ നിർവഹിക്കും. തുടർന്ന് ഭക്ഷ്യ ഉൽപ്പാദകർക്കായി പരിശീലന ക്ലാസും സംഘടിപ്പിക്കും.

പീരുമേട് സർക്കിളിൽ നടത്തിയ പരിശോധനകളിൽ വിവിധ നിയമലംഘനങ്ങൾ കണ്ടെത്തിയതിനെ തുടർന്ന് 25 പേരിൽ നിന്നായി ₹81,000 പിഴ ഈടാക്കി. ഇടുക്കി ജില്ലയിലെ ഷാപ്പ് ജീവനക്കാർക്കും ലൈസൻസ് ഉടമകൾക്കുമായി കമ്പളിക്കണ്ടത്ത് ഫോസ്ടാക് (FoSTaC) പരിശീലനവും നടത്തി.

ശുചിത്വ മാനദണ്ഡങ്ങൾ പാലിക്കാത്തതിനാൽ കാന്തല്ലൂർ പഞ്ചായത്ത് കോവിൽക്കടവിൽ പ്രവർത്തിക്കുന്ന രാജു വെജിറ്റബിൾസ് & ചിക്കൻ സെന്റർ ശുചിത്വ നിലവാരം ഉറപ്പാക്കുന്നതുവരെ പ്രവർത്തനം നിർത്തിവയ്ക്കാൻ ഭക്ഷ്യസുരക്ഷാ വകുപ്പ് നിർദേശിച്ചു.

ഓണത്തോടനുബന്ധിച്ച പരിശോധനകളുടെ ഭാഗമായി ആകെ 40 പരിശോധനകൾ നടത്തി. രണ്ട് സ്കൂളുകളിലും ഒരു വൃദ്ധസദനത്തിലും പരിശോധന നടത്തി. എട്ട് തിരുത്തൽ നോട്ടീസുകളും മൂന്ന് കോംപൗണ്ടിംഗ് നോട്ടീസുകളും നൽകി. കൂടാതെ എട്ട് സർവെയ്ലൻസ് സാമ്പിളുകളും 17 സ്റ്റാറ്റ്യൂട്ടറി സാമ്പിളുകളും പരിശോധനയ്ക്കായി ശേഖരിച്ചു.