കട്ടപ്പന: കട്ടപ്പന–കുട്ടിക്കാനം സംസ്ഥാന പാതയോരത്ത് കാഞ്ചിയാർ പാലക്കട മേഖലയിൽ രാത്രിയുടെ മറവിൽ വ്യാപകമായി നിലം നികത്തി മണ്ണിടുന്നതായി നാട്ടുകാർ പരാതി ഉയർത്തുന്നു. പ്രകൃതിദത്തമായ നീരൊഴുക്ക് തടസ്സപ്പെടുത്തുന്ന തരത്തിലാണ് മണ്ണിടൽ നടക്കുന്നതെന്നാണ് പ്രദേശവാസികൾ ആരോപിക്കുന്നത്.

പ്രദേശത്തുകൂടി ഒഴുകുന്ന നിരവധി ചെറിയ തോടുകളും നീർച്ചാലുകളും മണ്ണിട്ട് നികത്തിയാണ് ഈ പ്രവർത്തനങ്ങൾ നടക്കുന്നതെന്നാണ് നാട്ടുകാർ പറയുന്നത്. മഴക്കാലത്ത് വെള്ളക്കെട്ടിനും സമീപ പ്രദേശങ്ങളിൽ വെള്ളപ്പൊക്ക ഭീഷണിക്കും ഇത് കാരണമാകുമെന്ന ആശങ്കയും ഉയരുന്നുണ്ട്.

ഇതിന് മുമ്പും ഇതേ മേഖലയിൽ വ്യാപകമായി നിലം നികത്തൽ നടന്നിട്ടുണ്ടെങ്കിലും ഫലപ്രദമായ നടപടികൾ ഉണ്ടായില്ലെന്നാണ് പ്രദേശവാസികളുടെ ആരോപണം. അതേസമയം, സാധാരണക്കാർ ചെറിയ തോതിൽ പോലും നിയമലംഘനം നടത്തിയാൽ കർശന നടപടികൾ സ്വീകരിക്കുന്ന സർക്കാർ സംവിധാനങ്ങൾ, കണ്ണുമുന്നിൽ നടക്കുന്ന ഇത്തരം വലിയ പ്രവർത്തനങ്ങൾ കണ്ടില്ലെന്ന് നടിക്കുകയാണെന്ന വിമർശനവും ശക്തമാണ്.

പരിസ്ഥിതിക്കും പൊതുജനങ്ങളുടെ സുരക്ഷയ്ക്കും ഭീഷണിയാകാവുന്ന ഇത്തരം പ്രവർത്തനങ്ങളിൽ അടിയന്തര അന്വേഷണം നടത്തി, നിയമവിരുദ്ധമായ മണ്ണിടലും തോട് നികത്തലും നടക്കുന്നുണ്ടോ എന്ന് പരിശോധിക്കണമെന്നും, കുറ്റക്കാർക്കെതിരെ നിയമനടപടി സ്വീകരിക്കണമെന്നും നാട്ടുകാർ ആവശ്യപ്പെടുന്നു.

കേരള ജേർണൽ ഈ വിഷയത്തിൽ ബന്ധപ്പെട്ട വകുപ്പുകളുടെ വിശദീകരണം തേടുകയും, അവരുടെ പ്രതികരണം ലഭിക്കുന്ന മുറയ്ക്ക് പ്രസിദ്ധീകരിക്കുകയും ചെയ്യും.