റിപ്പബ്ലിക് ദിന സന്ദേശം എല്ലാ കുട്ടികളിലും എത്തിക്കുന്നതിനായി പച്ചടി ശ്രീനാരായണ എല്‍.പി സ്‌കൂളില്‍ റിപ്പബ്ലിക് ദിന സംഗമം സംഘടിപ്പിച്ചു. 77-ാമത് റിപ്പബ്ലിക് ദിനത്തിന്റെ ഓര്‍മ്മയ്ക്ക് കുട്ടികള്‍ 77 എന്ന സംഖ്യയുടെ രൂപത്തില്‍ അണിനിരന്നു. മഹാത്മാഗാന്ധി, ഭാരത മാതാവ്, ജവഹര്‍ലാല്‍ നെഹ്രു, സുഭാഷ് ചന്ദ്ര ബോസ്, ഡോ. ബി.ആര്‍. അംബേദ്കര്‍ തുടങ്ങിയവരുടെ പ്രച്ഛന്ന വേഷങ്ങളണിഞ്ഞ് കുട്ടികള്‍ ശ്രദ്ധേയമായി.

തുടര്‍ന്ന് ദേശഭക്തിഗാനത്തിന്റെ അകമ്പടിയോടെ കുട്ടികള്‍ റിപ്പബ്ലിക് ദിന നൃത്തം അവതരിപ്പിച്ചു. ഇന്ത്യന്‍ ഭരണഘടന കൈയിലേന്തിയുള്ള റിപ്പബ്ലിക് ദിന പ്രസംഗം, സ്വാതന്ത്ര്യദിന പ്രതിജ്ഞ, ഭരണഘടനാ ആമുഖ വായനം, ദേശഭക്തിഗാന ആലാപനം തുടങ്ങിയ പരിപാടികളും നടന്നു.

രാജ്യത്തിന്റെ ചരിത്രവും റിപ്പബ്ലിക് ദിനത്തിന്റെ പ്രാധാന്യവും കുട്ടികളിലേക്കെത്തിക്കാന്‍ ഈ പരിപാടി ഏറെ സഹായകമായതായി സ്‌കൂള്‍ ഹെഡ്മാസ്റ്റര്‍ പി.കെ. ബിജു പറഞ്ഞു. പി.ടി.എ സെക്രട്ടറി കെ.വി. സതീഷ് ഉള്‍പ്പെടെ എല്ലാ അധ്യാപകരും പരിപാടികള്‍ക്ക് നേതൃത്വം നല്‍കി.