കട്ടപ്പന: സാമൂഹ്യ-രാഷ്ട്രീയ വിഷയങ്ങളെ ആസ്പദമാക്കി ഒരുക്കുന്ന ദർശന തിയേറ്റർ ഫെസ്റ്റിവൽ ‘26 മാർച്ച് 1ന് കട്ടപ്പന CSI ഗാർഡനിൽ നടക്കും. സമകാലീന സമൂഹാവസ്ഥകളോട് ശക്തമായ പ്രതികരണം രേഖപ്പെടുത്തുന്ന മൂന്ന് നാടകങ്ങളാണ് ഫെസ്റ്റിവലിന്റെ ഭാഗമായി അരങ്ങേറുന്നത്.

കെ.ആർ. രമേശും പി.ജെ. ഉണ്ണികൃഷ്ണനും ചേർന്ന് അവതരിപ്പിക്കുന്ന “കാണ്മാനില്ല”, അബീഷ് ശശിധരന്റെ “മീനച്ചിൽ R”, ഇ.ജെ. ജോസഫും മനോജ് നാരായണനും ചേർന്നൊരുക്കുന്ന “വെളിച്ചത്തിനെന്തു വെളിച്ചം!” എന്നീ നാടകങ്ങളാണ് വേദിയിലേറുന്നത്.

നാടകപ്രവർത്തനവും നാടകകാഴ്ചയും ഒരുപോലെ രാഷ്ട്രീയ ഇടപെടലാണെന്ന സന്ദേശം ഉയർത്തിപ്പിടിച്ചാണ് ഫെസ്റ്റിവൽ സംഘടിപ്പിക്കുന്നത്. സമൂഹത്തിന്റെ നൈതികവും രാഷ്ട്രീയവുമായ ചോദ്യങ്ങൾ കലാരൂപമായ നാടകത്തിലൂടെ പ്രേക്ഷകരിലേക്ക് എത്തിക്കുകയാണ് ലക്ഷ്യമെന്ന് സംഘാടകർ അറിയിച്ചു.

നാടകാസ്വാദകർക്കും സാംസ്‌കാരിക പ്രവർത്തകർക്കും ഫെസ്റ്റിവൽ ഒരു വ്യത്യസ്ത അനുഭവമാകുമെന്ന് പ്രതീക്ഷിക്കുന്നു.