ചേവായൂരിലെ അവയവദാന ആശുപത്രിക്ക്‌ ആലിന്റെ പേര് നൽകുമെന്ന് മുഖ്യമന്ത്രി 

അവയവദാനത്തിൽ പുതുചരിത്രംകുറിച്ച പത്തുമാസം പ്രായമുള്ള ആലിൻ ഷെറിൻ്റെ വീട്ടിലെത്തി മുഖ്യമന്ത്രി പിണറായി വിജയൻ. കോട്ടയത്തുണ്ടായ വാഹനാപകടത്തിൽ മസ്‌തിഷ്‌ക മരണം സംഭവിച്ച പത്തുമാസം പ്രായമുള്ള ആലിൻ ഷെറിൻ എബ്രഹാം നാലുപേർക്ക് ജീവനേകിയാണ് കടന്നുപോയത്. മല്ലപ്പളളി വാലുമണ്ണിൽ അരുണിൻ്റെയും ഷെറിൻ്റെയും ഏകമകളായ ആലിൻ സംസ്ഥാനത്തെ ഏറ്റവും പ്രായം കുറഞ്ഞ അവയവദാതാവാണ്.

ആലിന്റെ വീട്ടിലെത്തിയ മുഖ്യമന്ത്രി മാതാപിതാക്കളെയും ബന്ധുക്കളെയും ആശ്വസിപ്പിച്ചു. ആരോഗ്യമന്ത്രി വീണാ ജോർജ്, സിപിഐ എം പത്തനംതിട്ട ജില്ലാ സെക്രട്ടറി രാജു എബ്രഹാം അടക്കമുള്ളവർ മുഖ്യമന്ത്രിക്കൊപ്പം ഉണ്ടായിരുന്നു. കോഴിക്കോട് ചേവായൂരിൽ വരാൻപോകുന്ന അവയവദാന ആശുപത്രിക്ക് ആലിന്റെ പേര് നൽകുമെന്ന് മുഖ്യമന്ത്രി കുടുംബത്തെ അറിയിച്ചു.